धनगढी (हाम्रा खेलकुद) – खेल सम्बन्धी संस्थाहरुको संस्थागत सुशासनका लागि दुुई दिने तालिम कैलालीमा सुुरु भएको छ । नेपाल खेलकुद पत्रकार मञ्च जिल्ला समन्वय शाखा कैलालीको व्यवस्थापनमा सुदूरपश्चिम खेलकुद परिषदको आयोजनामा कैलालीको चुरे गाउँपालिकामा तालिम शुरु भएको हो ।

मञ्चका अध्यक्ष सिताराम ओझाको अध्यक्षतामा भएको तालिमको चुरे गाउँपालिका उपाध्यक्ष धनादेवी थापाले ब्यानरबाट हस्ताक्षर गरेर समुदघाटन गरिन् । उपाध्यक्ष थापाले खेलकुद क्षेत्रबाटै वडा, स्थानीय तह र जिल्लालाई पहिचान गराउन सकिने बताइन् ।

‘खेल क्षेत्रको विकासका लागि गाउँपालिकाले हरेक क्षेत्रमा सहयोग र समन्वय गर्न तयार छ ।’ उनिले भनिन्, ‘खेलकुदले मानिसलाई अनुशासित पनि बनाउने बताइन । खेलकुदले मानिसलाई स्वस्थ राख्न पनि टेवा पुर्याउने छ ।’

कार्यक्रममा नेपाल पत्रकार महासंघ सुदूरपश्चिम प्रदेश अध्यक्ष योगेश रावलले मञ्चले प्रदेशमा खेलकुदको विकासमा थप बल दिइरहेको बताए । उनले खेलकुद मंचमा आवद्ध पत्रकारकै कारण यस प्रदेशमा ओझेलमा रहेका खेल क्षेत्र र खेलाडीहरुलाई देशभरी चिनाउन कलममार्फत योग्दान पुर्याईरहेको बताए ।

मञ्चका उपाध्यक्ष श्रवण देउवाले स्वागत गरेको कार्यक्रमको सञ्चालन सचिव भानुुभक्त आचार्यले गरेका थिए । तालिममा कान्तिपुरका खेलकुद पत्रकार हिमेश ब्रजाचार्य, खेलकुद पत्रकार मञ्चका सचिव अन्जन खड्का र सदस्य गोविन्दराज नेपाल र विराट जंग रायमाझीलगायत प्रशिक्षण दिनेछन् ।