काठमाडौं (हाम्रो खेलकुद) – नेपाल भलिवल संघ प्रदेश नम्बर १ को अध्यक्षमा खेम राई सर्वसम्मत चयन भएका छन् । इटहरीमा भएको चौथो साधारणसभा तथा अधिवेशनले राईको अध्यक्षतामा १३ सदस्यीय प्रदेश समिति निर्विरोध रुपमा चयन गरेको हो ।

समितिको उपाध्यक्षमा सुनसरीका गोपाल श्रेष्ठ, ताप्लेजुङका डम्बर लिम्बु र मोरङका विरबल थापा निर्विरोध भए । महासचिवमा झापाका लेखनाथ पराजुली, सचिवमा धनकुटाका बिनय राई र कोषाध्यक्षमा ओखलढुङ्गाका थलु राजभण्डारी सर्वसम्मत चयन भए ।

सदस्यमा तेह«थुमकी तुलसी खापुङ, इलामका राजकुमार खाती, सोलुखुम्बुका रामबहादुर खड्का, पाँचथरका प्रभा काम्वाङ, उदयपुरका निर्मलकुमार चौधरी र संखुवासभाका प्रशिद्ध श्रेष्ठ सर्वसम्मत चयन भए ।

भलिबल संघ प्रदेश १ का अध्यक्ष हरि निरौलाको अध्यक्षतामा भएको कार्यक्रममा प्रदेश १ खेलकूद विकास बोर्डका सदस्य सचिव हंसराज वाग्ले, नेपाल भलिवल संघका सचिव तथा जिल्ला तथा प्रदेश १ निर्वाचन संयोजक मदन खड्का, अन्तर्राष्ट्रिय खेलाडी दीपक सापकोटा, संघको तर्फबाट नेपालको पहिलो कप्तान ऋषि आचार्य, खेलकूद विकास बोर्ड प्रदेश १ सदस्य रितेश श्रेष्ठको उपस्थिति रहेको थियो ।

साधारणसभामा प्रदेश १ का १४ वटै जिल्लाबाट प्रतिनिधित्व रहेको निर्वाचित महासचिव लेखनाथ पराजुलीले जानकारी गराए ।