काठमाडौं (हाम्रो खेलकुद) – बागमती प्रदेशकी सन्तोषी श्रेष्ठ, आर्मीका मुकेश पाल, आर्मीकै सोम बहादुर कुमाल र एपिएफकी रमिता कुमारी थारुले ४४औं राष्ट्रिय एथलेटिक्स प्रतियोगितामा स्वर्ण जितेका छन् ।

त्रिपुरेश्वरस्थित दशरथ रंगशालाको ट्रयाकमा शुक्रबार भएको स्पर्धामा सन्तोषी र मुकेशले १५ सय मिटरमा तथा सोम बहादुर र रमिता ४ सय मिटर दौडमा पहिलो भएका हुन् ।

महिलातर्फ बागमतीकी सन्तोषीले निर्धारित दुरी ४ मिनेट ४२.८ सेकेण्डमा पूरा गर्दै स्वर्ण जितिन् । आर्मीकी पूर्ण लक्ष्मी न्यौपाने ४ मिनेट ५८.२ सेकेन्डसहित दोस्रो तथा एपिएफकी आशा राउत ५ मिनेट ०५.९ सेकेण्डसहित तेस्रो भइन् ।

पुरुषतर्फ आर्मीका मुकेश पालले ३ मिनेट ५६.७ सेकेण्डमा दुरी पार गर्दै स्वर्ण जिते, एपिएफका अजित कुमार यादवले ३ मिनेट ५८.८ सेकेण्डसहित रजत पदक जिते । आर्मीका सुनिल सुनारले ४ मिनेट ०१.८ सेकेण्डसहित तेस्रो स्थान हासिल गरे ।

पुरुष ४ सय मिटरमा आर्मीका सोम बहादुरले ४८.७९ सेकेण्डसहित स्वर्ण जिते । आर्मीकै प्रकाश दनुवारले ४९.९२ सेकेण्डसहित रजत पदक तथा ५०.९० सेकेण्डसहित एपिएफका निरप्रताव महतोले कास्य जिते ।

महिलातर्फ एपिएफकी रमिता कुमारी थारुले ५९.८९ सेकेण्डमा दुरी पार गर्दै स्वर्ण जितिन् । आर्मीकी निर्मला थापाले १ मिनेट १.०६ सेकेण्डसहित रजत तथा लुम्विनी प्रदेशकी अरुणा रिजालले १ मिनेट १.९ सेकेण्डसहित कास्य जित्न सफल भइन् ।

नेपाल एथलेटिक्स संघको आयोजनामा शुक्रबारदेखि भएको प्रतियोगितामा सात प्रदेश र तीन विभागीय टोली (आर्मी, प्रहरी र सशस्त्र) गरी १० टिमबाट २ सय ४० खेलाडीको सहभागिता रहनेछन् । तीनदिने प्रतियोगितामा महिलातर्फ १५ र पुरुषतर्फ १६ स्पर्धा गरी कुल ३१ स्वर्णका लागि प्रतिस्पर्धा हुनेछ ।

प्रतियोगितामा १ सय मिटर, २ सय मिटर, ४ सय मिटर, ८ सय मिटर, १५ सय मिटर, ३ हजार मिटर, हाइजप, लङ जम्प, त्रिपल जम्प, ज्यााभलिन, सटपुट, डिसकस, ४ वाई १ सय मिटर रिले, ४ वाई ४ सय मिटर रिले र ११० हडल्स महिला र पुरुष दुवैमा प्रतिस्पर्धा हुनेछ । ४ मिटर हडल्समा पुरुषमा मात्रै प्रतिस्पर्धा हुनेछ ।