काठमाडौं (हाम्रो खेलकुद) – न्यू डायमन्ड एकेडेमीले प्रथम चन्द्रागिरी न्यू डायमन्ड महिला भलिबल प्रतियोगितामा लगातार दोस्रो जित दर्ता गरेको छ ।

चन्द्रागिरी नगरपालिकास्थित न्यू डायमन्ड एकेडेमीको भलिबल कोर्टमा बिहीबार भएको खेलमा न्यू डायमन्डले ज्ञान सुधा एकेडेमीलाई २५–१० र २५–१६ को सोझो सेटमा पारजित गर्दै लगातार दोस्रो जित आत्मसात गरेको हो । न्यु डायमन्डले यसअघि परोपकार आदर्श माविलाई २–० कै सोझो सेटमा जित निकालेको थियो ।

लगातार दोस्रो जितसँगै डायमन्ड एक खेल बाँकी छँदै फाइनलमा प्रवेश गरेको छ । डायमन्डले अब राउन्ड रोविन लिगको अन्तिम खेलमा ब्राइट होराइजनसँग शुक्रबार खेल्नेछ । यस खेलमा जित हात पारे न्यु डायमन्ड राउन्ड रोविन लिगमा शीर्षस्थानमा रहँदै फाइनलमा पुग्नेछ ।

बिहीबारै भएको दोस्रो खेलमा परोपकार आदर्श माविले ब्राइट होराइजन चिल्ड्रेन होमलाई २–० को सोझो सेटमै पराजित गर्दै पहिलो जित निकालेको छ । परोपकार यसअघि पहिलो खेलमा न्यु डायमन्डसँग पराजित भएको थियो । परोपकारले ब्राइट होराइजनमाथि २५–९ र २५–२ को सेटमा जित निकाल्न सफल भयो ।

यो नतिजाले परोपकार र ज्ञान सुधाको फाइनल पुग्ने सम्भावना रहेको छ । यि दुई टोलीले शुक्रबार प्रतिस्पर्धा गर्नेछ । जित हात पार्ने टोली फाइनलमा प्रवेश गर्नेछ । शनिबार सम्म चल्ने प्रतियोगितामा न्यू डायमन्डसहित चार विद्यालयको सहभागिता रहेको छ ।

जसमा डायमन्डसहित परोपकार आदर्श मावि, ज्ञान सुधा एकेडेमी र ब्राइट होराइजन चिल्ड्रेन होमको सहभागिता रहेको छ । खेलहरु राउन्ड रोविन लिगको आधारमा हुने छ । शीर्ष दुई टोलीले उपाधिको लागि प्रतिस्पर्धा गर्नेछ । तेस्रो र चौथो हुनेले तेस्रो स्थानको लागि प्रतिस्पर्धा गर्नेछ ।

चन्द्रागिरी नगरपालिकाले मुख्य प्रायोजन तथा न्यू डायमन्ड स्पोर्ट्स क्लबको आयोजनामा भएको प्रतियोगिताको विजेताले ५० हजार रुपैयाँसहित शिल्ड, मेडल र प्रमाणपत्र प्राप्त गर्नेछ । दोस्रो हुनेले २५ हजार र तेस्रोले १५ हजार रुपैया, शिल्ड, मेडल र प्रमाणपत्र प्राप्त गर्नेछ । चौथो हुनेले १० हजार रुपैयाँ, शिल्ड र प्रमाण पत्र प्राप्त गर्नेछन् ।

सर्वाेत्कृष्टले तीन हजार रुपैयासहित ट्रफी प्राप्त गर्नेछन् । व्यक्तिगत विधाको उत्कृष्टहरुले समान १ हजार रुपैया र ट्रफी प्राप्त गर्नेछन् ।