(हाम्रो खेलकुद) – स्पिन इभेन्ट्स प्रालिको आयोजनामा भाद्रको तेस्रोदेखि आयोजना हुने ‘पूर्ण शंकर श्रेष्ठ दोस्रो देशव्यापी अन्तर वडा टेबल टेनिस प्रतियोगिता’ मा मुख्य प्रायोजकको रुपमा समाजसेवी पूर्ण शंकर श्रेष्ठ जोडिएको छ ।

अखिल नेपाल टेबल टेनिस संघको तत्वावधानमा वार्षिक कार्यक्रमअन्तर्गत हुन लागेको प्रतियोगिताको लागि बिहीबार आयोजक स्पिन इभेन्ट्स प्रालि र समाजसेवी पूर्ण शंकर श्रेष्ठबीच सम्झौता भएको छ । उनीहरुले सम्झौता पत्रमा हस्ताक्षरसँगै आदान–प्रदान गरे ।

करिव १५ लाख रुपैया अनुमानित लागत रहेको यस प्रतियोगितालाई पूर्ण शंकरले हरेक वर्ष मुख्य प्रायोजकवापत अनुमानित लागतको ५० प्रतिशत प्रतियोगिता दौरान बुझाउनु हुनेछ ।

प्रतियोगिता लैनचौरस्थित राष्ट्रिय टेबल टेनिस प्रशिक्षण केन्द्रमा भाद्र २१ देखि २५ सम्म आयोजना हुनेछ । प्रतियोगितामा नेपाल अधिराज्य भरका वडाका खेलाडीहरूले सहभागिता जनाउने छन् ।

आघिल्लो वर्ष यस प्रतियोगितामा मेन्स टिम, वुमेन्स टिम, मेन्स सिंगल, वुमेन्स सिंगल, मेन्स भेट्रान सिंगल्स (४० वर्षमाथि र मेन्स भेट्रान्स सिंगल्स (५५ वर्षमाथि) गरेर ६ स्पर्धामा खेलाडीहरूले प्रतिस्पर्धा गरेका थिए । यस वर्ष मेन्स भेट्रान सिंगल्स (५५ वर्षमाथि) को स्पर्धालाई हटाएर २ नयाँ स्पर्धा (मेन्स भेट्रान सिंगल्स (५० वर्षमाथि) र मेन्स भेट्रान्स सिंगल्स (६० वर्षमाथि)) थप गरि १७ स्पर्धामा प्रयियोगिता संचालन गरिने छ ।

वर्तमान टप १६ टेबल टेनिस खेलाडी बाहेक, देशभरीका अन्य खेलाडीहरूले यस प्रतियोगितामा भाग लिन सक्नेछन् । यस प्रतियोगिताको पुरस्कार राशी २ लाख ३० हजार रुपैया रहेको छ । महिला र पुरुष सिंगल्स स्पर्धाका शीर्ष चारले
क्रमश ३० हजार, १५ हजार, समान ७ हजार ५ सय रुपैया हात पार्नेछन् ।

भेट्रान्स सिंगल्स तर्फ प्रथम, द्वितीय र तृतीय (दुवै सेमी–फाइनलिष्ट) हरूलाई क्रमशः १० हजार, ५ हजार, र २ हजार ५ सय हात पार्नेछन् । पदक तालिका अनुसार शीर्ष स्थान हासिल गर्न सफल वडालाई नगद रु.५०,०००÷– (पचास हजार रुपैया मात्र) का साथै रनिङ्ग शिल्ड प्रदान गरिनेछ ।