काठमाडौं (हाम्रो खेलकुद) – न्यू डायमन्ड स्पोर्ट्स क्लबको आयोजनामा प्रथम चन्द्रागिरी न्यू डायमन्ड महिला भलिबल प्रतियोगिता आज (बुधबार) देखि शुरु हुने भएको छ ।

प्रतियोगिताका सबै खेलहरु चन्द्रागिरी नगरपालिकास्थित न्यू डायमन्ड एकेडेमीको भलिबल कोर्टमा हुनेछ । शनिबार सम्म चल्ने प्रतियोगितामा न्यू डायमन्डसहित चार विद्यालयको सहभागिता रहेको छ ।

जसमा डायमन्डसहित परोपकार आदर्श मावि, ज्ञान सुधा एकेडेमी र ब्राइट होराइजन चिल्ड्रेन होमको सहभागिता रहेको छ । यो प्रतियोगिताको मुख्य उद्देश्य विद्यालयस्तरमा खेलाडी उत्पादन गर्नु रहेपनि यसपटक वर्षातका कारण धेरै विद्यालयलाई खवर नगरिएको आयोजकले जनाएको छ ।

राउन्ड रोविन लिगको आधारमा हुने प्रतियोगिताको पहिलो दिन दुई खेल हुनेछ । न्यु डायमन्ड र परोपकार तथा ज्ञान सुधा र ब्राइट होराइजनबीच प्रतिस्पर्धा हुनेछ । हरेक खेलहरु अपरान्ह ४ बजेपछि हुनेछ । शीर्ष दुई टोलीले उपाधिको लागि प्रतिस्पर्धा गर्नेछ । तेस्रो र चौथो हुनेले तेस्रो स्थानको लागि प्रतिस्पर्धा गर्नेछ । प्रतियोगितालाई चन्द्रागिरी नगरपालिकाले मुख्य प्रायोजन गरेको छ ।

पहिलो हुनेले ५० हजार रुपैयाँसहित शिल्ड, मेडल र प्रमाणपत्र प्राप्त गर्नेछ । दोस्रो हुनेले २५ हजार र तेस्रोले १५ हजार रुपैया, शिल्ड, मेडल र प्रमाणपत्र प्राप्त गर्नेछ । चौथो हुनेले १० हजार रुपैयाँ, शिल्ड र प्रमाण पत्र प्राप्त गर्नेछन् ।

सर्वाेत्कृष्टले तीन हजार रुपैयासहित ट्रफी प्राप्त गर्नेछन् । व्यक्तिगत विधाको उत्कृष्टहरुले समान १ हजार रुपैया र ट्रफी प्राप्त गर्नेछन् । प्रतियोगिताको उद्घाटन चन्द्रागिरी नगरपालिकाका प्रमुख घनश्याम गिरीले गर्नेछन् ।