काठमाडौं (हाम्रो खेलकुद) – महालक्ष्मी फिटनेस एकेडेमीले पारा तेक्वान्दो खेलाडीलाई सम्मानित गरेको छ । महालक्ष्मी फिटनेस एकेडेमीले एक कार्यक्रम गर्दै सृजना घिसिङ रन्जना धामी, राम बहादुर अधिकारी र प्रशिक्षक कविराज नेगी लामालाई सम्मानित गरेका हुन् ।

उनीहरुलाई महालक्ष्मी नगरपालिका ललितपुरका मेयर हरि गोविन्द श्रेष्ठ र डोजाङ प्रमुख एवं संयोजक थानेश्वर दर्लामी मगरलगायतले सम्मानित गरे । रन्जना धामीले पछिल्लोपटक सन् २०२२ हुने भनिएको हङ्जाउ एसियन पारा गेम्सको युएईमा भएको छनोटमा कास्यपदक जित्न सफल भएकी थिइन् । उनले त्यसअघि विश्व च्याम्पियनशिप २०१७, युके र एशियन चम्पियनशिपहरुमा कास्यपदक जितेकी थिइन् ।

सृजना घिसिङले बहराइनको मनामामा भएको एशियन युथ पारा गेम्स २०२१ र २०७८ फागुनमा भएको डब्लुटी प्रेसिडेन्ट कप एसिया क्षेत्रमा रजत पदक जितेकी थिइन् । राम बहादुर अधिकारीले सन् २०२२ हुने भनिएको हङ्जाउ एसियन पारा गेम्सको युएईमा भएको छनोटमा उच्च प्रदर्शनसँगै विगतमा विश्व च्याम्पियनशिप २०१७, युके र एशियन चम्पियनशिपहरुमा उत्कृष्ट प्रदर्शन गरेका थिए ।

यस्तै प्रशिक्षक कविराज नेगी लामा टोकियो २०२० पारा ओलम्पिक गेम्स, एशियन युथ पारा गेम्स २०२१, विश्व तेक्वान्दो प्रतियोगिता, एशियन तेक्वान्दो प्रतियोगिता तथा विभिन्न पारा तेक्वान्दो अन्तराष्ट्रिय प्रतियोगिताहरुमा नेपालको तर्फबाट पारा तेक्वान्दो खेलमा प्रशिक्षकको भूमिकामा रहेर सहभागी हुनु भई नेपाली पारा खेलकुदको यात्राको इतिहासमा नेपाली पारा तेक्वान्दो खेलाडीहरुलाई उत्कृष्ट प्रदर्शन गरी नेपालको शान राख्न सफल प्रशिक्षक हुन् ।