काठमाडौं(हाम्रो खेलकुद) – बलियो नेपाल कप यू-१५ क्रिकेट प्रतियोगिताको सेमिफाइनल समिकरण पूरा भएको छ। बलियो नेपाल न्युट्रिसन इनिसिएटिभको आयोजना तथा क्विन्स इभेन्ट मेनेजमेन्टको व्यवस्थापनमा जारी प्रतियोगितामा बलियो प्रदेश १, बलियो लुम्बिनी प्रदेश, बलियो मधेश प्रदेश र बलियो बागमती प्रदेश सेमिफाइनलमा पुगेका छन् ।

समूह चरण अन्तर्गतको अन्तिम खेलमा बलियो लुम्बिनीलाई ५ विकेटले हराउँदै बलियो प्रदेश १ समूह ए को विजेताको रुपमा सेमिफाइनल प्रवेश गरेको छ। शुक्रवार तल्लो मुलपानी मैदानमा सम्पन्न दिनको पहिलो खेलमा बलियो प्रदेश १ ले बलियो लुम्बिनी प्रदेशका बिरुद्ध रोमाञ्चक जित दर्ता गर्यो । ओसिलो मैदानका कारण १६ ओभरमा छोट्याइएको खेलमा टस जितेर ब्याटिङ गर्दै बलियो लुम्बिनी प्रदेशले ७ विकेट गुमाउँदै १ सय ९ रन जोडेको थियो।

उसका सन्तोष साउदले सर्वाधिक ३८ तथा रौनक श्रीवास्तवले १४ रन बनाए । बलियो प्रदेश १ का रुशल रिमालले ४ ओभरमा ११ रन खर्चिएर तीन विकेट लिए ।

जितको लागि १ सय १० रनको विजयी लक्ष्य पछ्याएको बलियो प्रदेश १ ले एक बल बाँकी रहँदा पाँच विकेट गुमाउँदै पूरा गर्यो । बलियो प्रदेश १ लाई जितको लागि अन्तिम दुई बलमा तीन रन आवश्यक रहँदा वाई स्वरुप ४ रन प्राप्त गरेपछि बलियो प्रदेश १ को जित सम्भव बनेको थियो। बलियो प्रदेश १ को जितमा आलोक मण्डलले ३७ रन तथा रबिन मण्डलले २४ रन बनाए । बलियो लुम्बिनी प्रदेशका आयुष ओलीले तीन विकेट लिए । खेलको प्लेयर अफ दि म्याच बलियो प्रदेश १ का आलोक मण्डल चुनिए ।

दिनको दोस्रो खेलमा बलियो मधेश प्रदेशले बलियो ११ लाई ४६ रनले पराजित गर्दै समूह बी को विजेता रुपमा सेमिफाइनलमा पुग्यो । टस हारेर पहिले ब्याटिङको निम्तो पाएको बलियो मधेश प्रदेशले निर्धारित २० ओभरमा ६ विकेट गुमाउँदै १ सय ३१ रन बनाएको थियो । उसका राहुल कुमार महतोले सर्वाधिक ६२ रनको योगदान गरे। विशाल यादव २० जोडे । बलियो ११ को बलिङ्गमा जेनिश पुन मगर र प्रतिक पण्डितले दुई दुई विकेट लिए ।

जितको लागि १ सय ३२ रनको विजयी लक्ष्य पछ्याएको बलियो ११ ले १८.५ ओभरमा ८५ रनमा अल आउट भयो । उसका ओपनर ईजाज उल हक ले अविजित ४० तथा कप्तान स्मिथ बुढाले १५ रन जोड्न बाहेक अन्य ब्याट्स्मेनले दोहोरो अंकमा रन जोड्न सकेनन् ।

बलियो ११ लाई सस्तैमा समेट्न बलियो मधेश प्रदेशका साइमन रोए र रोहन शाहले समान दुई दुई विकेट लिए । खेलको प्लेयर अफ दि म्याच राहुल कुमार महतो घोषित भए। शनिवार हुने पहिलो सेमिफाइनलको खेलमा बलियो प्रदेश १ र बलियो बागमती प्रदेश तथा दोस्रो सेमिफाइनल खेलमा बलियो मधेश प्रदेश र बलियो गण्डकी प्रदेश भिड्ने छन् । फाइनल असार पाँचमा हुनेछ ।