काठमाडौं (हाम्रो खेलकुद) – १३औं दक्षिण एसियाली खेलकुद (साग) का दोहोरो स्वर्णधारी सुवास तामाङ र प्रतिमा शेर्पाले ओलम्पिक दिवस २०२२ को अवसरमा आयोजना भएको राष्ट्रिय गल्फ च्याम्पियनसिपको उपाधि जितेका छन् ।

सुवासले पुरुषतर्फको २१ वर्षमुनि तथा प्रतिमा महिलामा च्याम्पियन बन्न सफल भएका हुन् । गोकर्ण गल्फ क्लबमा शुक्रबार अन्तिम दिन सुवासले ५ अन्डर ६७ को स्कोर गर्दै १८ अन्डर १९८ स्कोर गरे ।

उनका निकटतम प्रतिद्वन्द्वी सद्भाव आचार्यले एक अन्डर २१५ को कुल स्कोरका लागि तीन ओभर ७५ रन बनाएर उपविजेता बने । उनले १६ वर्षमुनिको उमेर समूहको उपाधि जिते । शायन बस्न्यातले २३ ओभरमा २८६ स्कोरसहित यू–१६ मा उपविजेता बने ।

महिला गल्फमा आज प्रतिमा शेर्पाले तीन ओभर ७५ रन बनाएर कुल ९ ओभर २२५ स्कोरका साथ उपाधि जितिन् । कश्मिरा शाहले २३ ओभर २३९ को कुल स्कोरका साथ दोस्रो स्थान हासिल गरिन् । गल्स १६ वर्षमुनि आयस्टिना टण्डन कुल ३२१ अंकका साथ विजेता र सोनी तामाङ ३५५ अंकका साथ उपविजेता भइन् ।

नेपाल गल्फ संघले राष्ट्रिय खेलकुद परिषद्, नेपाल ओलम्पिक कमिटी, आर एन्ड एको सहयोगमा आयोजना गरेको ५४ होल प्रतियोगितामा १४ ब्वाइज र १५ गल्स गरी २९ गल्फरले सहभागिता जनाएका थिए ।

प्रतियोगिताका विजयी खेलाडीलाई नेपाल गल्फ संघका अध्यक्ष टाशी घले, महासचिव सीबी भण्डारी, कोषाध्यक्ष किशन अग्रवाल र नेपाल ओलम्पिक कमिटीका सदस्य रमेशप्रसाद शिवाकोटीले ट्रफी प्रदान गरे ।