काठमाडौं (हाम्रो खेलकुद) – सुवास तामाङ र प्रतिमा शेर्पा ओलम्पिक दिवस २०२२ को उपलक्ष्यमा आयोजना गरेको राष्ट्रिय गल्फ च्याम्पियनसिपको फाइनल राउण्डमा पुग्न सफल भएका छन् ।

१३औं दक्षिण एसियाली खेलकुद (साग) को दोहोरो स्वर्णपदक विजेता तामाङले राष्ट्रिय टोलीका सदस्य सद्भाव आचार्यमाथि ७ अण्डर ६५ को स्कोर बनाएर ९ स्ट्रोकको अग्रता लिएका छन् । सद्भावले बिहीबार १ ओभर ७३ सहित कुल ४ अन्डर १४० स्कोर गरेका छन् । २७ ओभर १७१ सहित किसन परियार तेस्रो स्थानमा रहेका छन् । उनले बिहीबार ११ ओभर ८३ स्कोर गरे । रणदीप थापा १३ ओभर ८५ बनाएर ३२ ओभर १७६ रनमा छन् ।

महिला गल्फर प्रतिमा शेर्पा ६ ओभर १५० को कुल स्कोरका साथ महिलातर्फ अग्रतामा छिन् । उनले बिहीबार ६ ओभर ७८ रन बनाएकी कश्मिरा शाहमाथि आठ स्ट्रोकको अग्रता लिएकी छिन् ।

राष्ट्रिय खेलकुद परिषद्, नेपाल ओलम्पिक कमिटी, आर एन्ड ए र गोकर्ण फरेस्ट रिसोर्टको सहयोगमा नेपाल गल्फ संघले आयोजना गरेको ५४ होल प्रतियोगिता हो । यू–२१ र महिलाको विश्व वरीयता प्रतियोगितामा १४ पुरुष र १६ महिला गरी ३० गल्फर सहभागी छन् ।