स्टेन्डिङ क्रिकेटमा नेपालको सान्त्वना जित

काठमाडौं (हाम्रो खेलकुद) – फिजिकल्ली च्यालेन्ज क्रिकेट (स्टेन्डिङ क्रिकेट) टी–२० अन्तर्राष्ट्रिय सिरिजको अन्तिम खेलमा नेपालले भारतलाई हराएको छ ।

सिरिजको अन्तिम तथा तेस्रो खेलमा भारतलाई १ विकेटले पराजित गर्दै नेपालले सान्त्वना जित निकालेको हो । योसँगै तीन खेलको सिरिज भारतले २–१ ले आफ्नो पक्षमा पारेको छ ।

मुलपानी क्रिकेट मैदानमा सोमबार भएको खेलमा भारतले दिएको ९१ रनको लक्ष्य नेपालले १९ ओभरमा ९ विकेट गुमाएर पूरा ग¥यो । नेपालका लागि डम्बर बहादुर राना मगरले २३ रनको योगदान दिए । यस्तै कुन्ज बिहारी चौधरीले २० रन जोडे ।भारतका अरुण गिरि र सायद शाह अजिजले समान ३ विकेट लिए ।

त्यसअघि पहिले ब्याटिङ गरेको भारतले १८ ओभर ४ बलमा अलआउट हुँदै ९० रन जोडेको थियो । भारतका अरुण गिरि र जामिर पाथनले समान १७ रन जोडे । सायद शाह अजिजले १२ रन बनाए । नेपालका सुमन बरालले ४ तथा राहुल कुमारले २ विकेट लिए ।

नेपाल ह्वीलचेयर क्रिकेट संघको आयोजनामा भएको सिरिज अन्तर्गत शनिबार भएको पहिलो खेलमा भारत १२ रनले विजयी भएको थियो । आइतबार भएको दोस्रो खेलमा भारतले नेपाललाई ७७ रनले हराएको थियो ।