काठमाडौं (हाम्रो खेलकुद) – स्वस्तिश्री गुरुकुल आई वि वल्ड स्कुलमा अन्तर्राष्ट्रिय ओलम्पिक दिवसको अवसरमा १० दिनसम्म विभिन्न खेलहरु आयोजना हुने भएको छ ।

ओलम्पिक डेको अवसरमा १० दिनसम्म हुने खेलकुद कार्यक्रमको नेपाल ओलम्पिक कमिटी अन्तर्गत (स्पोर्टस् फर अल कमिसन) का संयोजक विष्णु गोपाल श्रेष्ठले उद्घाटन गरे ।

संयोजक श्रेष्ठले ओलम्पिकको स्थापना र यसको महत्वमाथि प्रकाश पार्दै नेपाली खेलकुदको क्षेत्र र खेलाडीको भविष्य उज्जल रहेको बताउादै विद्यालयका सम्पूर्ण वालवालिकाहरुलाई खेलकुदमा भाग लिन आग्रह गरे ।

संयोजक श्रेष्ठले स्वास्थ्यका लागि खेल र राष्ट्रका लागि खेलाडीको आवश्यक रहनेमा जोड दिए । उनले कार्यक्रमको उद्घाटन गर्दै फुटबल खेलका लागि फुटबल हस्तान्तरण गरे ।

विद्यालयमा जेठ ३० गतेदेखि असार ८ गतेसम्म फुटबल, बास्केटवल, स्केटिङ, टेवल टेनिस, तेक्वान्दो, पौडी र कराँतेलगायतका खेलहरु हुने विद्यालयका ईसिए कोअर्डिनेटर राकेश कुमार राईले जानकारी दिए ।

विद्यालयका अध्यक्ष रामकृष्ण चित्रकारले राष्ट्रिय तथा अन्तर्राष्ट्रिय स्तरमा सञ्चालन गरिने सबै खालका खेलका लागि आफ्नो विद्यालयको पूर्वाधार सक्षम रहेको बताए ।

कार्यक्रममा विद्यालयकी प्रबन्ध निर्देशक मीना महर्जन, नेपाली राष्ट्रिय फुटबल टिमका पूर्व कप्तान अनिल गुरुङसँगै विद्यालयका सहायक प्राचार्य सुमन लामा र विद्यालयका सञ्चार निर्देशक चिराग वाङ्देलको उपस्थिति रहेको थियो ।