काठमाडौं (हाम्रो खेलकुद) – अन्तर्राष्ट्रिय पार्कर खेलाडी दिनेश सुनारले १०औं पटक गिनिज बुकमा नाम लेखाउने भएका छन् । उनले एकैपटक चार कीर्तिमान थप्दै गिनिज बुकमा १० कीर्तिमान लेखाउने भएका हुन् ।

अमेरिकाको ओहायो राज्यको एक्रोण शहरस्थित एसियन सर्भिस इन्क एक्सनको आयोजनामा भएको इन्टरनेसनल कम्युनिटी फेस्टिबलमा दिनेशले दि मोस्ट फुल ट्वीस्ट किक, लो स्ट्यान्डिङ ब्याकवार्ड समरसल्ट, दि मोस्ट फुल ट्वीस्ट ब्याकफ्लिक र दि मोस्ट वान ह्यान्ड कार ह्वील्समा नयाँ कीर्तिमान कायम गरेका हुन् ।

दि मोस्ट फुल ट्वीस्ट किक दि मुनमा दिनेशले ३० सेकेण्डमा १२ पटक हानेर यसअघि १० पटक रहेको कीर्तिमान तोडेका हुन् । यस्तै उनले लो स्ट्यान्डिङ ब्याकवार्ड समरसल्टमा बेलायतका रायन लुनले २६.५ सेन्टिमिटर दुरीको कीर्तिमान तोड्दै नयाँ कीर्तिमान बनाए । उनले ७ सेन्टिमिटरको दुरीमा ग्याप राख्दै हानेका थिए ।

दि मोस्ट फुल ट्वीस्ट ब्याकफ्लिकको ३० सेकेन्डमा १३ पटक हान्दै आफ्नै नाममा रहेको कीर्तिमान तोड्दा दि मोस्ट वान ह्यान्ड कार ह्वील्सको ३० सेकेन्डमा २७ पटक हानेर नयाँ कीर्तिमान कायम गर्न सफल भए ।

फेस्टिबलमा एक र सनसाइन तेक्वान्दो एकेडेमीमा ३ नयाँ रेकर्डसँगै उनको नाममा १० वटा विश्व रेकर्ड बनेको छ ।