काठमाडौं (हाम्रो खेलकुद) – युरो स्कुलले बृहस्पति एसइइ खुल्ला फुटसल प्रतियोगिताको बिहीबार उपाधि जितेको छ । काष्ठमण्डप विद्यालयलाई १–० ले पराजित गर्दै उपाधि जित्न सफल भएको हो ।

नक्सालथित बृहस्पति विद्या सदनको फुटसल ग्राउन्डमा भएको खेलमा युरोलाई च्याम्पियन बनाउन दोस्रो हाफमा कृष थापा मगरले गरेको गोल नै निर्णायक बन्यो । उपाधिसँगै युरोले १० हजार रुपैया र शिल्ड हात पारेको छ ।

दोस्रो भएको काष्ठमण्डपले ५ हजार रुपैया हात पारेको छ । काष्ठमण्डपकी सराह बज्राचार्य प्रतियोगिताको सर्वाेत्कृष्ट खेलाडी घोषित भइन् । उनले ५ हजार रुपैयासँगै ट्रफी हात पारिन् । उनी प्रतियोगिता खेल्ने एक्लो महिला खेलाडी थिइन् ।

च्याम्पियन टोलीका खेलाडीले बृहस्पति विद्या सदनमा प्लस टु पढ्न चाहेमा शतप्रशित छात्रवृत्ति प्राप्त गर्नेछन् । च्याम्पियन टोलीको ८ जनालाई १ लाख ८० हजार रुपैया अर्थात पूर्ण छात्रवृत्ति प्रदान गरिएको छ । दोस्रो भएको टोलीले ९० हजार अर्थात ६० प्रतिशत छात्रवृत्ति पाउनेछन् ।

विजयी टोली तथा खेलाडीलाई नेपाली राष्ट्रिय फुटबल टोलीका पुर्व कप्तान राकेश श्रेष्ठ, आयोजक बृहस्पतिको प्लस टु इनचार्ज सुरेश काफ्ले, स्टुडेन्ट डेभलपमेन्ट अफिसर मनिष केसी लगायतले पुरस्कृत गरे । नकआउटका आधारमा भएको एक दिने प्रतियोगितामा विभिन्न १६ टोली रहेको थियो ।