काठमाडौं (हाम्रो खेलकुद) – नेपाली महिला राष्ट्रिय भलिबल टोलीकी सदस्य कामना बिष्टसम्मिलित पुलिस क्लब माल्दिभ्समा जारी माल्दिभ्स भलिबल एसोसिएसन कप २०२२ को सेमिफाइनल मा हार बेहोरेको छ ।

लिगमा लगातार चौथो जित निकालेर अपराजित रहँदै सेमिफाइनलमा प्रवेश गरेको पुलिस क्लब वाम्कोसँग ३–२ को सेटमा हार भोगेको हो ।

माल्दिभ्सको मालेमा सोमबार राति भएको प्रतिस्पर्धात्मक र रोमाञ्चक खेलमा पुलिसले सुरुवाती दुई सेट गुमाएपनि त्यसपछिको लगातार दुई सेट आफ्नो पक्षमा पार्दै खेलमा फर्कने संकेत दिएपनि टोली पाँचौ सेटमा निरिह बन्यो ।

पहिलो सेट १५–२५ र दोस्रो सेट २१–२५ ले गुमाएको पुलिसले त्यसपछि तेस्रो सेट २५–२१ र २५–२२ ले आफ्नो पक्षमा पारेपछि खेल पाँचौ सेटमा लम्विएको थियो । तर, निर्णायक सेटमा निरिह बनेको पुलिसले ५–१५ को सोझो सेटमा हार बेहोर्न पुग्यो ।

यस्तै अर्काे सेमिफाइनलमा क्लब इगलले टिम क्लब भलिबललाई २५–९, २५–९ र २५–१६ को सोझो सेटमा पराजित गरेको छ ।

कामना र उषाले घरेलु भलिबलमा विभागीय नेपाल पुलिस क्लबबाट व्यवसायिक खेल खेल्ने गर्छन् । कामना र उषाको यो पहिलोपटक विदेशी लिग खेल हो । लिगमा १० टोलीको सहभागिता रहेको छ ।

यसअघि नेपालबाट माल्दिभ्सको उक्त लिगमा राष्ट्रिय टोलीकी पुर्व उपकप्तान मन्जु गुरुङ, कोपिला उप्रेती, निमा श्रेष्ठ, राष्ट्रिय टोलीकी सदस्य प्रतिभा माली, सरस्वती चौधरी र अरुणा शाहीले खेलिसकेकी छिन् ।