एजेन्सी – पाँचौ वरीयताका स्पेनिस राफयल नाडाल कीर्तिमानी १४औं पटक फ्रेन्च ओपनको च्याम्पियन बनेको छ । आठौं वरीयताका आफ्नै चेला क्यास्पर रुडलाई ३–० को सोझो सेटमा पराजित गदै नाडालले कीर्तिमानी उपाधि जित्न सफल भएका हुन् ।

पेरिसमा आइतबार राति एकपक्षीय बनेको फाइनलमा क्ले कोर्टका बादशाह नाडालले नर्वेजियन क्यास्पर रुडलाई ६–३, ६–३ र ६–० को सोझो सेटमा जित निकाल्न सफल भयो । २३ वर्षीय रुडले २०१८ देखि स्पेनको मलोर्कामा रहेको नाडालको एकेडेमीमा प्रशिक्षण गर्दै आइरहेका छन् ।

योसँगै नाडालले कीर्तिमानी १४औं पटक फ्रेन्च ओपन तथा कीर्तिमानी २२औं पटक ग्रान्डस्लाम च्याम्पियन बन्न सफल भएको छ। नाडाल यसअघि फ्रेन्च ओपनमा २००५, २००६, २००७, २००८, २०१०, २०११, २०१२, २०१३, २०१४, २०१७, २०१८, २०१९ र २०२० मा च्याम्पियन बनेको थियो ।

नाडालले १४ फ्रेन्च ओपन, चार युएस ओपन र समान दुई विम्वल्डन र अष्ट्रेलियन ओपन जितेका छन् ।यस्तै उनी सर्वाधिक ग्रान्डस्लाम जित्ने एक्लो खेलाडी बनेका छन् । स्वीस रोजर फेडेरर र सर्वियन नोभाक जोकोभिचले समान २० ग्रान्डस्लाम जितेका छन् ।

यस्तै ३६ वर्षीय नाडाल फ्रेन्च ओपन जित्ने पहिलो पाका खेलाडी बनेका छन् । यस सन् १९३० मा अमेरिकाका बिल टिल्डेन ३७ वर्षको उमेरमा फाइनल प्रवेश गरेपनि उपाधि जित्न सकेको थिएन ।