लमजुङ (हाम्रो खेलकुद) – बेसीशहर नगरपालिकाले लमजुङ सदरमुकाम बेशीशहरमा सञ्चालन भएको संघ, प्रदेश र स्थानिय तहबीचको फुटसल प्रतियोगिताको उपाधि जितेको छ ।

लमजुङ फुटसलमा आइतबार भएको फाइनलमा बैंकर्स टिम लमजुङलाई १०–० को फराकिलो गोल अन्तरले पराजित गर्दै बेसीशहर नगरपालिकाले उपाधि हात पारेको हो । बेसीशहरले पहिलो र दोस्रो हाफमा समान ५ गोल गरेको थियो ।

उपाधिसँगै बेसीशहरले २६ हजार रुपैया बराबरको खसी ट्रफी, मेडल र प्रमाणपत्र हात पारेको छ । दोस्रो भएको बैंकर्स टिमले १७ हजार रुपैयाँ बराबरको बोका जितेको छ । प्रतियोगिताभर कुल ९ गोल गरेका बेशीशहरका ईश्वर अधिकारी सर्वाधिक गोलकर्ता भए ।

प्रतियोगितामा पूर्वाधार विकास कार्यालय लमजुङ अनुशासित टिम घोषित भए । सिडेन तनहँुका अभिषेक बराल उत्कृष्ट गोलरक्षक चुनिए । बैंकर्सका सुरेश थापा उत्कृष्ट खेलाडी चुनिए । अनुशाषित टोलीलाई बेसीशहर मोडल अस्पतालबाट प्रायोजित ३ हजार तथा उत्कृष्ट सबैलाई सिडेन कास्कीका सदस्य अनुप शेरचनले १ हजार रुपैया र कप हात पारे ।

विजयी टोली तथा खेलाडीलाई नेपाली काँग्रेसका निवर्तमान अध्यक्ष भेषबहादुर पौडेल, सिडेन नेपाल निवर्तमान उपाध्यक्ष लक्ष्मण केसी, नेपाली काँग्रेस गण्डकी प्रदेशको संगठन विभाग प्रमुख हरिप्रसाद बराल, आयोजक संस्था सेन्टर फर डेमोक्रेटिक इञ्जिनियर्स नेपाल (सिडेन)ल का अध्यक्ष दीपेन्द्र रावललगायतले पुरस्कृत गरे । प्रतियोगितामा तनहुँ, लमजुङ र गोरखाका गरी कुल १० टिमको सहभागिता रहेको थियो ।