काठमाडौं (हाम्रो खेलकुद) – नेपाली महिला राष्ट्रिय भलिबल टोलीकी सदस्य कामना बिष्टसम्मिलित पुलिस क्लब माल्दिभ्समा जारी माल्दिभ्स भलिबल एसोसिएसन कप २०२२ मा अपराजित रहन सफल भएको छ ।

लिगमा लगातार चौथो जित निकाल्ने क्रममा शनिबार राति भएको खेलमा पुलिसले भलिबल योङ न्यु जेनेरेसन क्लबलाई ३–१ को सेटमा पराजित गर्दै अपराजित रहन सफल भएको हो ।

पुलिसले पहिलो खेल क्लब इगल्स, दोस्रो खेलमा राष्ट्रिय टोलीका उषा भण्डारी सम्मिलित दिबेही सिफान्जी क्लब र तेस्रो खेलमा क्लब हाल्फलाईन लिंकेजलाई पराजित गरेको थियो ।

माल्दिभ्सको मालेमा शनिबार राति भएको खेलमा पुलिसले पहिलो सेट २५–१८ ले आफ्नो पक्षमा पारेको थियो । दोस्रो सेट १८–२५ ले गुमाएको पुलिसले त्यसपछि तेस्रो २५–१४ ले तथा चौथो सेट २५–६ ले सहजै आफ्नो पक्षमा पार्न सफल भयो ।

राष्ट्रिय टोलीकी अर्की सदस्य उषा भण्डारी सम्मिलित दिबेही सिफान्जी क्लबले चार खेलमा तेस्रो हार बेहोरेको छ । दिबेही सिफान्जीले शनिबार राति क्लब इगलसँग ३–२ को सेटमा पराजित हुन पुग्यो । यसअघि दिबेही सिफान्जीले पुलिस क्लब र भलिबल युथ न्यु जेनेरेसनसँग हार बेहोरेको थियो ।

कामना र उषाले घरेलु भलिबलमा विभागीय नेपाल पुलिस क्लबबाट व्यवसायिक खेल खेल्ने गर्छन् । कामना र उषाको यो पहिलोपटक विदेशी लिग खेल हो ।

यसअघि नेपालबाट माल्दिभ्सको उक्त लिगमा राष्ट्रिय टोलीकी पुर्व उपकप्तान मन्जु गुरुङ, कोपिला उप्रेती, निमा श्रेष्ठ, राष्ट्रिय टोलीकी सदस्य प्रतिभा माली, सरस्वती चौधरी र अरुणा शाहीले खेलिसकेकी छिन् ।