काठमाडौं (हाम्रो खेलकुद) – विभागीय नेपाल एपिएफका गोपी चन्द्र पार्की र नेपाल पुलिस क्लबकी राजपुरा पछाईले १०औं संस्करणको ‘कान्तिपुर हाफ म्याराथन’ को उपाधि जितेका छन् ।

शनिबार बिहान भएको हाफ म्याराथनमा गोपी पुरुषतर्फ तथा राजपुरा महिलामा च्याम्पियन बनेकी हुन् । गोपी कान्तिपुर हाप म्याराथनमा दोस्रोपटक तथा राजपुरा पहिलोपटक च्याम्पियन बनेकी हुन् । गोपीले यसअघि २०७२ मा उपाधि जितेका थिए ।

गोपीले निर्धारित दुरी १ घन्टा ७ मिनेट ४१ सेकेन्डमा पुरा गरे । दोस्रोदेखि पाँचौ सम्म आर्मीका खेलाडीले वर्चश्व जमाएको छ । आर्मीका दीपक अधिकारीले १ घन्टा ७ मिनेट ५० सेकेन्डमा दुरी पार गर्दै दोस्रो भए । उनी गोपीसँग ९ सेकेन्डले पछि परे ।

आर्मीकै मुकेश पालले १ घन्टा ८ मिनेट ४७ सेकेन्डमा दुरी पार गर्दै तेस्रो भए । आर्मीकै गजेन्द्र राईले १ घन्टा ९ मिनेट १ सेकेन्डमा दुरी पार गर्दै चौथो भए । आर्मीकै नरेन्द्र सिंह रावलले १ घन्टा ९ मिनेट १० सेकेन्डमा तथा आर्मीकै खगेन्द्र भाटले १ घन्टा १० मिनेट १५ सेकेन्डमा दुरी पार गर्दै पाँचौ र छैटौं भए ।

महिलातर्फ पुलिसकी राजपुरा पछाईले १ घन्टा १९ मिनेट १० सेकेन्डमा दुरी परा गर्दै पहिलो भइन् । एपिएफकी पुष्पा भण्डारीले १ घन्टा २२ मिनेट ५ सेकेन्डमा दुरी पार गर्दै दोस्रो भइन् । पुलिसकी रेखा विष्टले १ घन्टा ३० मिनेट ५२ सेकेन्डमा दुरी पार गर्दै तेस्रो भइन् ।

आर्मीकी निर्मला केसीले १ घन्टा ३१ मिनेट १३ सेकेन्डमा दुरी पार गर्दै चौथो स्थानमा आइन् । एपिएफकी वृन्दा धनके श्रेष्ठले १ घन्टा ३३ मिनेट २७ सेकेन्डमा तथा आर्मीकी गीता विकले १ घन्टा ३६ मिनेट ३ सेकेन्डमा दुरी पार गर्दै क्रमश पाँचौ र छैटौं भइन् ।

उपाधिसँगै गोपी र राजपुराले समान १ लाख रुपैया हात पारेका छन् । दोस्रो भएको दीपक र पुष्पाले ५० हजार, तेस्रो भएको मुकेश र रेखाले ३० हजार, चौथो भएको गजेन्द्र र निर्मलाले २० हजार, पाँचौ भएका नरेन्द्र र व्रिन्दाले १० हजार र छैटौ भएका खगेन्द्र र गीता विकले समान ५ हजार रुपैया हात पारे ।

कर्पोरेट ५ किमी पुरुषतर्फ विकास पोखरेलले १७ मिनेट ४८.२७ सेकेन्डमा दुरी पार गर्दै पहिलो भए । शेर बहादुर थारुले १८ मिनेट ४७.६९ सेकेन्डमा दुरी पार गर्दै दोस्रो भए । रितेश वलीले १९ मिनेट ४२.६६ सेकेन्डसहित तेस्रो भए ।

कर्पाेरेट महिलामा सनी तामाङले २६ मिनेट ३४.२४ सेकेन्डसहित पहिलो भइन् । सुनिता महर्जनले २७ मिनेट ४.४२ सेकेन्डसहित दोस्रो भइन् । लादेन प्रधानले ३० मिनेट १७.१७ सेकेन्डमा दुरी पुरा गर्दै तेस्रो भइन् । कर्पाेरेटतर्फको विजेताले पोखरामा २ रात र ३ दिनको तथा घुम्ने प्याकेज हात पारे । दोस्रो भएकाले नगरकोटमा रातको प्याकेज र तेस्रोले माउन्टेन फ्लाइटको टिकट प्राप्त गरेका छन् ।

३ किमी ह्वीलचेयर पुरुषतर्फ रमेश खत्रीले १२ मिनेट ३२.०३ सेकेन्डसहित पहिलो भए । प्रेम बहादुर विकले १४ मिनेट ८.३५ सेकेन्डसहित दोस्रो स्थान हात पारे । दान बहादर थिङले १४ मिनेट १५.३२ सेकेन्डसहित तेस्रो स्थान हासिल गरे । म्हिलमा यमी झाक्री मगर पहिलो तथा रजनी राई दोस्रो भइन् । ह्विल चेयरको विजेतााले समान ३० हजार, दोस्रो हुनेले समान २० हजार र तेस्रो हुनेले समान १० हजार प्राप्त गरे ।

१०औं संस्करणको हाफ म्याराथनको प्रधानमन्त्री शेर बहादुर देउवा र कान्पिुर पब्लिकेसनका सिएमडी कैलाश सिरोहियाले उद्घाटन गरेका थिए । नेपाल एथलेटिक्स सघंको प्राविधिक सहयोगमा हाफ म्याराथन (२१.१ किलोमिटर), ३ किमिको ह्विल चेयर दौड र ५ किमिको कर्पोरेट दौड गरी तीन विधामा प्रतिस्पर्धा भएको थियो । झन्डै ४ हजार धावकले म्याराथनमा सहभागिता जनाएको आयोजकले जनाएको छ ।

हाफ म्याराथन कान्तिपुर पब्लिकेसन थापाथलीबाट सुरु भई माइतीघर, बानेश्वर, तिनकुने, कोटेश्वर, जडीबुटी, लोकन्थली, गट्ठाघर, सानोठिमी हुँदै सल्लाघारी चोक पुगेर सोही रुट फिर्ता हुदै कान्तिपुर पब्लिकेसनमा आएर सकिएको थियो ।

ह्विल चेयर दौड कान्तिपुर पब्लिकेसन थापाथलीबाट सुरु भई माइतीघर मण्डला घुमेर पुन कान्तिपुर पब्लिकेशन आएर सकिने छ ।कर्पोरेट दौड कान्तिपुर पब्लिकेसन थापाथलीबाट सुरु भई माइतीघर, बानेश्वर हुँदै सिभिल हस्पिटल पुगेर पुन त्यहिँ बाटो फर्केर कान्तिपुर पब्लिकेशन थापाथली आएर टुंगिने छ ।

एनआइसी एसिया बैंक, दि ब्रिटिस कलेज, पाठशाला नेपाल फाउन्डेसन, सिटिजन लाईफ इन्स्योरेन्स, टर्किस एअरलाइन्स, केएफसी, पिजा हट, ह्याम्स अस्पताल, डिस होम फाइवर नेट र वेलडन एडभरटाइजिङ सह प्रायोजक रहेका छन् ।

कान्तिपुर हाफ म्याराथनका हालसम्मका सम्मका विजेताहरु
२०६७– अर्जुन कुमार बस्नेत / कान्छीमाया कोँजु
२०६८– हरि कुमार रिमाल / बृन्दा श्रेष्ठ
२०६९– कल्याण बाँनिया / कान्छीमाया कोँजु
२०७०– अनिष थापामगर / कान्छीमाया कोँजु
२०७१– हरि कुमार रिमाल / विश्वरुपा बुढा
२०७२– गोपीचन्द्र पार्की / रेशु बस्नेत
२०७३– हरि कुमार रिमाल / कान्छीमाया कोँजु
२०७४–७५ – हरि कुमार रिमाल / कान्छीमाया कोँजु
२०७५–७६ – अनिष थापामगर / विश्वरुपा बुढा
२०७९ – गोपीचन्द्र पार्की / राजपुरा पछाई