काठमाडौं (हाम्रो खेलकुद) – नेपाल खेलकुद पत्रकार मञ्च (एनएसजेएफ) को एकेडेमी र नेपाल फेन्सिङ संघको संयुक्त आयोजनामा एकदिने फेन्सिङ खेलबारेको प्रशिक्षण सम्पन्न भएको छ ।

एनएसजेफ एकेडेमीले ‘नो योर गेम’ अन्तर्गत यसपटक शुक्रबार फेन्सिङ खेलसम्बन्धी प्रशिक्षण कार्यक्रम सञ्चालन गरेको हो ।सातदोबाटोस्थित नेपाल ओलम्पिक कमिटी (एनओसी) को भवनमा आयोजित प्रशिक्षणमा कुल ३० खेलपत्रकार सहभागी भएका थिए । संंघका महासचिव सुजनलाल श्रेष्ठ, फेन्सिङका प्रमुख प्रशिक्षक अभिषेक कार्की र कोषाध्यक्ष अनुप कपालीले फेन्सिङ खेलबारे प्रशिक्षण दिएका थिए ।

श्रेष्ठले विश्वमा फेन्सिङ र नेपालमा फेन्सिङको इतिहास, कार्कीले खेलको तीन विधा फोइल, एपी र सावेरको प्राविधिक पक्ष र कपालीले स्कोरिङ नियमबार प्रशिक्षित गराएका थिए ।

कार्यक्रमको उद्घाटन गर्दै नेपाल ओलम्पिक कमिटी (एनओसी) का महासचिव निलेन्द्रराज श्रेष्ठले खेलका प्राविधिक पक्षबारे ज्ञान हुँदा मात्र पत्रकारले विश्लेषणात्मक समाचार उठान गर्ने भएकाले यो प्रशिक्षण कार्यक्रम उपलब्धिमूलक हुने बताए ।

मञ्चका अध्यक्ष दुर्गानाथ सुबेदी (देवेन्द्र) ले कुनैपनि खेलबारे प्राविधिक पक्षको ज्ञान अभाव हुँदा ती खेलको रिपोटिङमा पत्रकारको चासो कम हुने यस्तै खालका प्रशिक्षणले यि समस्याहरु ह्ल हुँदै जाने बताए । नेपाल फेन्सिङ संघका अध्यक्ष सुनिललाल श्रेष्ठले निकै चुनौतीपूर्ण अवस्थाका बाबजुद नेपालमा यो खेललाई उचाइमा पु¥याएको बताए ।

एनएसजेफ एकेडेमीले ‘नो योर गेम’ सिरिजअन्तर्गत सञ्चालन गरेको यो पाँचौं खेलको प्रशिक्षण हो । यसअघि बक्सिङ, रक क्लाम्बिङ, ब्याडमिन्टन र भलिबल खेलबारे पत्रकारलाई प्रशिक्षण दिइएको थियो ।