एजेन्सी – इन्डियन प्रिमियर लिग (आइपिएल) २०२२ को दोस्रो क्वालिफायरमा रोयल च्यालेन्जर्स बेंगलोरले राजस्थान रोयल्सविरुद्ध पहिला ब्याटिङ गर्ने भएको छ । नरेन्द्र मोदी स्टेडियम अहमदाबादमा राजस्थानका कप्तान सन्जु स्यामसनले टस जितेर पहिला फिल्डिङ गर्ने निर्णय लिएका छन् ।

राजस्थान र बेंगलोरले आजको खेलमा टोलीमा परिवर्तन गरेको छैनन् । राजस्थान पहिलो क्वालिफायरमा गुजरात टाइटन्ससँग ७ विकेटले पराजित हुँदै सोझैं फाइनलमा पुग्नबाट बाहिरिएको थियो । अन्तिम ६ बलमा १६ रन चाहिँएको अवस्थामा डेविड मिलरले प्रसिद्ध कृष्णलाई सुरुवाती तीन बलमा लगातार छक्का प्रहार गर्दै गुजरातलाई फाइनलमा पुर्याएका थिए । बेंगलोर भने एलिमिनेटर खेलमा लखनऊ सुपर जायन्ट्सलाई १४ रनले हराउँदै दोस्रो क्वालिफायरमा स्थान बनाएको थियो ।

बेंगलोरले सन् २०१६ पछि हालसम्म फाइनल खेल्न सकेको छैन । राजस्थान पहिलो संस्करणको २००८ को आइपिएल च्याम्पियनपछि फाइनल सम्मको यात्रा तय गर्न सकेको छैन ।

आइपिएलमा राजस्थान र बेंगलोरबीच कुल २७ खेल भएका छन् । राजस्थान ११ र बेंगलोर १३ खेलमा विजयी भएका छन् । जारी सिजनका दुई खेलमा दुबै टोली एक एक खेलमा विजयी भएका छन् ।

पहिलो खेलमा बेंगलोर ४ विकेटले विजयी हुँदा दोस्रो खेलमा २९ रनले पराजित भएको थियो । पछिल्ला पाँच प्रतिस्पर्धामा बेंगलोर चार खेलमा विजयी भएको छ ।