काठमाडौं (हाम्रो खेलकुद) – नेपाली राष्ट्रिय पारा तेक्वान्दो खेलाडी रन्जना धामीले पारा एसियाली खेलकुद (एसियाड) मा छनोटमा कास्य जितेपनि पारा एसियाडमा छनोन हुन असफल भएकी छिन् ।

चीनको हाङझावमा हुने पारा एसियाली खेलकुदका लागि दुवईमा भएको छनोट प्रतियोगितामा रन्जनाले आफ्नो विधामा कास्यपदक जितेपनि उनी पारा एसियाडलाई छनोट हुन असफल भएको प्रशिक्षक कविराज नेगी लामाले जानकारी गराए ।

के४४ (४७ केजी मुनि) पहिलो र दोस्रो हुने खेलाडी मात्रै छनोट हुने प्रावधान रहेकाले रन्जना छनोट हुन असफल बनिन् । रन्जना काजकस्तानकी क्रास्सभसि मिलानासँग १६–१८ को अंकमा चुकिन् । रञ्जनाले विश्व च्याम्पियनसिपसहित विभिन्न ३ अन्तर्राष्ट्रिय प्रतियोगितामा कांस्य जितेकी छन् ।

के४४ (५८ केजीमुनि) राम बहादुर अधिकारी इराकका अब्बास हुसेन हुसेनसँग ३३–३७ ले पराजित भए । दुवईमा भएको छनोटमा सहभागी हुन २ खेलाडीसहित ४ सदस्यीय नेपाली पारा तेक्वान्दो टोली मंगलबार युएइ प्रस्थान गरेको थियो । टोली प्रमुखमा रामचन्द्र श्रेष्ठ र प्रशिक्षकमा अन्तर्राष्ट्रिय लेभल– २ पारा तेक्वान्दो प्रशिक्षक कविराज नेगी लामा रहेका थिए ।
पारा ओलम्पियन पलेशा गोवद्र्धन र सिर्जना घिसिङ विश्व वरीयताका आधारमा यसअघि नै पारा एसियाली खेलकुदका लागि छनोट भइसकेका छन् ।