काठमाडौं (हाम्रो खेलकुद) – पूर्ण शर्माको टोलीले सूर्य नेपाल प्रिमियर गल्फ च्याम्पियनसिपको प्रो–एम उपाधि जितेको छ । आइतबार गोकर्ण गल्फ क्लबमा भएको खेलमा प्रो पूर्णमा एमेच्योर महेन्द्र फगामी, समीर आचार्य र कश्मिरा शाहको टोलीले १५३ अंक जोड्दै उपाधि जितेको हो ।

प्रो पूर्णले ४४, महेन्द्रले ३८, समीरले ३६ र कश्मिराले ३५ अंक जोडेका थिए । सञ्जय लामा (३८) र एमेच्योर कर्नल विकास शाह (३५), बाबु शेर्पा (३५) र कर्णेल प्रताप बोहरा (३४) को टोलीले कुल १४२ अंक जोड्दै दोस्रो भयो । रवि खड्का (३८) र एमेच्योर आङदेन्दी शेर्पा (३४), चन्द्र लिम्बु (३४) र किशोर बस्नेत (३४)को टोलीले १४० अंकसहित तेस्रो भयो ।

कश्मिरा शाहले उत्कृष्ट व्यक्तिगत महिला स्कोरको ट्रफी पनि जिते, उनले ३५ अंक जोडिन् । दावा जे शेर्पाले लङ्गेस्ट ड्राइभ र आरती राज्य लक्ष्मी राणाले क्लोसेस्ट टु दि पिनको उपाधि जिते । स्टेबलफोर्ड ३/४ ह्यान्डिक्यापमा खेलिएको प्रो–एम इभेन्टमा २४ खेलाडीसहित ११३ खेलाडीको सहभागित रहेको थियो ।

विजेतालाई सूर्य नेपाल प्रालिका प्रबन्ध निर्देशक डा. रवि कुमार रायवरम, पूर्व प्रबन्ध निर्देशक, सूर्य नेपाल प्रालिका अभिमन्यु पोद्दार, गोकर्ण गल्फ क्लबका अध्यक्ष सुहृद घिमिरे र एनजीएका अध्यक्ष टासी घलेले पुरस्कृत गरे ।

सूर्य नेपाल गल्फ टुर २०२१–२२ को सिजन समापन कार्यक्रम, सूर्य नेपाल प्रिमियर गल्फ च्याम्पियनसिप सोमबारदेखि सुरु हुदैछ । सिजनको अन्तिम प्रतियोगितामा ४३ प्रो र ११ एमेच्योर गल्फरले प्रतिस्पर्धा गर्नेछन् । विजेताले २ लाख ५० हजार, उपविजेताले १ लाख ५५ हजार र तेस्रो हुनेले १ लाख १० हजार र शीर्ष २१ ले पनि नगद पुरस्कार प्राप्त गर्नेछन् ।