सन्जुप्रति श्रद्धाञ्जली

काठमाडौं (हाम्रो खेलकुद) – दक्षिण एसियाली खेलकुद (साग) को १३ औं संस्करणकी स्वर्णधारी भारोत्तोलनकी स्व. सन्जु चौधरीको १३ औं दिनको पुण्य तिथिमा आइतबार त्रिपुरेश्वरस्थित राष्ट्रिय खेलकुद परिषद् (राखेप) मा श्रद्धाञ्जली सभा आयोजना गरियो ।

सागको भारोत्तोलनमा नेपाललाई स्वर्ण दिलाउने स्व. सन्जु एक मात्र नेपाली महिला खेलाडी हुन् । युवा तथा खेलकुद मन्त्री महेश्वरजंग गहतराज, राखेपका उपाध्यक्ष शिव कोइराला, राखेपका सदस्य–सचिव टंकलाल घिसिङ, नेपाल भारोत्तोलन संघका अध्यक्ष रामकृष्ण श्रेष्ठलगायतका पदाधिकारी, खेलाडी, प्रशिक्षणलगायतले स्व. सन्जुको तस्वीरमा फूलमाला, अविर र पुष्प गुच्छा चढाईं भावपूर्ण श्रद्धाञ्जली अर्पण गरेका थिए ।

दिवंगत आत्माको चिर शान्तिको कामना गर्दै एक मिनेट मौन धारण पनि गरिएको थियो । बाँके निवासी सन्जुको गत बैशाख २७ गते २२ वर्षको अल्पायु उमेरमा निधन भएको थियो ।