काठमाडौं (हाम्रो खेलकुद) – ग्रिष्मा मल्टिपर्पोज कोअपरेटिभ लिमिटेडले दोश्रो संस्करणको एनआरएस फुटसल प्रतियोगिताको उपाधि हात पारेको छ ।

ढुकु फुटसल हब बालुवाटारमा शनिबार भएको एक दिने प्रतियोगिताको फाइनलमा ज्याकीप्वाईन्ट हेल्थ प्रालिलाई ४–० ले पराजित गर्दै च्याम्पियन बन्न सफल भएको हो ।

एनआरएस स्पोर्टस् फाउण्डेसनको आयोजनामा भएको प्रतियोगिताको बिजेता ग्रिष्माले १ लाख रुपैयासहित ट्रफी, मेडल र प्रमाण पत्र प्राप्त गरे । दोस्रो भएको ज्याकीप्वाईन्टले ५० हजार रुपैयासहित ट्रफी, मेडल र प्रमाण पत्र प्राप्त गरे ।

च्याम्पियन गृष्माले त्रिपल फाइभ नाइस ट्राभल्सलाई १–० ले तथा उपबिजेता ज्याकीले नेपाल खेलकुद पत्रकार मञ्च (एनएसजेएफ) लाई ५–२ ले पराजित गर्दै फाइनलमा भेट पक्का गरेका थिए ।

च्याम्पियन टोली ग्रिष्माका सन्जोग श्रेष्ठ उत्कृष्ट खेलाडी तथा ग्रिष्माकै संयोग बास्कोटा उत्कृष्ट गोलरक्षक चुनिए । कुमारी बैंक लिमिटेड फेयर प्ले टोली बन्यो । उनीहरुले उनीहरुले समान ५ हजार पाए ।

विजयी टोली तथा खेलाडीलाई राष्ट्रिय खेलकुद परिषद (राखेप) का सदस्य सचिव टंकलाल घिसिङ, एनआरएस तथा नेपाल ओलम्पिक कमिटिका महासचिव निलेन्द्रराज श्रेष्ठ लगायतले पुरस्कृत गरे । प्रतियोगिताको उद्घाटन प्रतिनिधी सभाका साँसद् एवं नेपाल ओलम्पिक कमिटिका अध्यक्ष जीवनराम श्रेष्ठले गरेका थिए ।

एकदिने प्रतियोगितामा २१ कर्पाेरेट टोलीले सहभागिता जनाएका थिए । प्रतियोगिता लिग कम नकआउटका आधारमा भएको थियो ।