काठमाडौं (हाम्रो खेलकुद) – एमेच्योर सुवास तामाङले सूर्य नेपाल गल्फ टुर २०२१–२२ अन्तर्गत सातौं प्रतियोगिता सूर्य नेपाल एनपीजीए टुर च्याम्पियनसिपको पहिलो दिन अग्रता लिन सफल भएका छन् ।

गोकर्ण गल्फ क्लबमा सोमबार भएको खेलमा सुवासले शुक्रबहादुर राईमाथि एक–स्ट्रोकको अग्रता लिएका छन् । १३औं सागका दोहोरो स्वर्णपदक विजेता सुवासले शीर्ष स्थानमा रहन बोगी–फ्रि ८ अन्डर ६४ कार्ड बनाए । इन्डियन टुरमा ६ वटा खेल खेलेर टुरमा सामेल भएका प्रो शुक्रबहादुर राईले ७ अन्डर ६५ बनाए ।

एमेच्योर टाशी छिरिङ र प्रो रवि खड्काले ५ अन्डर ६७ मा तेस्रो स्थान हासिल गरे । नेपालका नम्वर एक प्रो भुवन नगरकोटी, दिनेश प्रजापति र एमेच्योर सद्भाव आचार्य चार अन्डर ६८ मा पाँचौं स्थानमा रहेका छन् । कमल तामाङ, रमेश अधिकारी र तीर्थ पौडेल दुई अन्डर ७० मा आठौं र धनबहादुर थापा वान अन्डर ७१ स्कोर गरेका छन् ।

एमेच्योर वाङ्चेन धोन्डुप र सुरेश तामाङ १२औं स्थानमा रहेका छन् । सुवासले फ्रन्ट नाइनमा पाँच अन्डर ३१ र ब्याक नाइनमा तीन अन्डर ३३ खेले ।

सुवासले तेस्रोबाट तीन सिधा बर्डी कार्ड गर्नुअघि पहिलो दुई होलमा पार्स बचत गरे । त्यसपछि पाँचौंमा इगलको सामना गरे । ब्याक नाइनमा सुवासले १०, १५ र १७औं होलमा बर्डिज कार्ड दिए ।

शुक्रले फ्रन्ट नाइनमा थ्री अन्डर ३३ र ब्याक नाइनमा चार अन्डर ३२ कार्ड बनाए । उनले तेस्रो, पाँचौं र सातौं होलमा बर्डिज कार्ड दिए । त्यसपछि उनले १२, १४, १७ र १८औं होलमा बर्डिजविरुद्ध १० र १३औं होलमा बोगी र ११औं होलमा इगलको सामना गरे ।

विजेताले १ लाख ३५ हजार नगद पुरस्कार पाउनेछन् । यस्तै उपविजेताले ८८ हजार तथा तेस्रोले ६५ हजार पाउनेछन् । यस्तै शीर्ष २१ मा पर्ने खेलाडीले समेत नगद पुरस्कार पाउने छन् ।