काठमाडौं (हाम्रो खेलकुद – नेपाल ओलम्पिक कमिटीको आयोजनामा बिहीबार भएको आर्ट फेस्टिबलमा ६२ विद्यार्थीको सहभागिता जनाएको छ ।

ओलम्पिक कमिटिले आगामी सेप्टेम्वरमा चीनको हांग्झोउमा हुने १९औं एसियाली खेलकुद (एसियाड) प्रचार प्रसारका क्रममा आर्ट फेस्टिबलको आयोजना गरिएको हो । विश्व खेलकुदका कुनै ठूलो महोत्सव अगाडि विद्यार्थी सम्मिलित यस्तो महोत्सव आयोजना गर्ने परम्परा छ । फेस्टिबलमा १७ स्कुलका ६२ विद्यार्थीको सहभागिता रहेको छ ।

यी विदार्थीबाट कोरिएको सबै आर्टलाई २० बैशाखमा प्रदर्शनमा राखिने ओलम्पिक कमिटिले जनाएको छ । यसमा सहभागी हुनेमध्येबाट ब्वाइजतर्फ ५ र गल्र्सतर्फ ५ उत्कृष्ट चयन गरिनेछ । यसलाई ओलम्पिक काउन्सिल अफ एसियामा पठाइने छ । थप छनोट गर्दै हांग्झोउमा प्रदर्शनीमा राखिनेछ ।

नेपाल ओलम्पिक कमिटीका अध्यक्ष जीवनराम श्रेष्ठले महोत्सवको उद्घाटन गर्दै प्रतिकात्मक रूपमा ओलम्पिकको चित्र कोरेका थिए । उनले चित्रकला र खेलकुदबीच नजिकको सम्बन्ध रहेको बताए । त्यस क्रममा कराँतेका मन्देकाजी श्रेष्ठ र टेबल टेनिसका मुना बासुकलाले आफूले कोरेको चित्रको प्रस्तुती दिएका थिए । त्यसै क्रममा उनीहरूले आफ्नो खेल खेल जीवनको अनुभवबारे बताएका थिए ।

आफू खेलकुदमा कसरी आकर्षित भयो भनेर पनि सहभागी विद्यार्थीसँग अनुभव साटेका थिए । कमिटीका वरिष्ठ उपाध्यक्ष तथा कार्यकारी निर्देशक चतुरानन्द राजबैद्यले चित्रकलाको माध्यमबाट नेपाली खेलकुदबारे नयाँ पुस्तामा जानकारी दिन पाएको खुसी व्यक्त गरे ।