काठमाडौं (हाम्रो खेलकुद) – आर्मीकी मिनु गुरुङ र बागमती प्रदेशकी सुस्मा तामाङ सन् २०२२ को सेम्टेम्वर १० देखि २५ सम्म चीनमा हुने १९औं एशियन गेम्स (एसियाड) को लागि सञ्चालित बक्सिङ छनोटको फाइनलमा प्रवेश गरेका छन् ।

नेपाल बक्सिङ संघको आयोजनामा सातदोबाटोमा बिहीबार भएको छनोटको दोस्रो दिन महिलातर्फ ५१ केजी तौल समुहमा आर्मी ‘ए’ की मिनु गुरुङले आर्मी ‘बी’ की ललिता महर्जनबाट वाक ओभर पाइन् । सोही तौल समूहमा बागमती प्रदेशकी सुस्मा तामाङले पुलिसकी रिता धरलालाई एबिडिका आधारमा जित निकाल्दै फाइनलको यात्रा तय गरिन् ।

५७ केजी तौल समुहमा बागमती प्रदेशकी हेमा राईले आर्मीकी चन्द्रकला थापाबाट वाकओभर पाइन् । सोही तौल समुहमा नेपाल आर्मी ‘बी’ की बिमला श्रेष्ठले नेपाल प्रहरी ‘ए’ निशा तामाङलाई ५–० ले हराइन् । ६० केजी तौल समुहमा एपिएफकी संगिता सुनारले बागमती प्रदेशका देचेन शेर्पाबाट वाकओभर पाइन् । सोही तौल समुहमा आर्मी ‘बी’ की वर्षा श्रेष्ठले आर्मी ‘ए’ की पुनम रावलबाट वाकओभर पाइन् ।

पुरुषतर्फ ५२ केजी तौल समुहमा बागमती प्रदेशका लक्ष्मण राईले आर्मीका प्रेम चौधरीबाट वाकओभर पाए । सोही तौल समुहमा पुलिसका चन्द्र बहादुर थापाले एपिएफका प्रदिप महर्जनलाई ४–१ ले हराए । ५७ केजी तौल समुहमा एपिएफका पुरन राईले आर्मीका ईन्द्र बहादुर सुनारलाई ५–० ले हराए । सोही तौल समुहमा बागमतीका सुरज महर्जनले पुलिसका शम्भु राजबंशीलाई ५–० ले हराए ।

६३ केजी तौल समुहमा पुलिसका भुपेन्द्र थापाले आर्मीका लालुआले मगरलाई ५–० ले हराए । सोही तौल समुहमा एपिएफका सोनाम सार्कीले बागमतीका निसान दासलाई ४–१ ले हराए । ७५ केजी तौल समुहमा आर्मीका दीपक श्रेष्ठले बागमतीका साजन थिङ्ग तामाङलाई ५–० ले हराए । सोही तौल समुहमा आर्मीकै दीपेश लामाले बागमतीका सनिल शाहीलाई ३–२ ले हराए ।