काठमाडौं (हाम्रो खेलकुद) – नेपाल बक्सिङ संघले विश्व महिला बक्सिङ च्याम्पियनसिपमा सहभागी हुने चार खेलाडीहरुलाई बन्द प्रशिक्षणमा बोलाएका छन् ।

संघले अन्तर्राष्ट्रिय बक्सिङ संघ (आइवा) विश्व महिला बक्सिङ च्याम्पियनसिप –२०२२ मा सहभागी हुने नेपालको उत्कृष्ट महिला चार बक्सरलाई बन्द प्रशिक्षणमा बोलाइएको जनाएको छ ।

आगमी मे ६ देखि २१ तारिखसम्म टर्कीको इस्तानबुल शहरमा हुने १२औं विश्व महिला बक्सिङ च्याम्पियनसिपमा नेपालबाट सुष्मा तामाङ, मिनु गुरुङ, चन्द्रकला थापा र पुनम रावलले प्रतिस्पर्धा गर्नेछिन् । सुष्माले ४८ केजी तौल समुहमा, ५२ केजी तौल समुहमा १३औँ साग स्वर्णधारी मिनु गुरुङ, ५७ केजी तौल समुहमा चन्द्रकला थापा र ६० केजी तौल समुहमा १३औँ साग स्वर्ण रजत पदक विजेता पुनम रावलले प्रतिस्पर्धा गर्नेछन् ।

सहभागी ४ जना खेलाडीहरु गत महिना नै थाइल्यान्ड ओपन अन्तर्राष्ट्रिय बक्सिङ च्याम्पियनसिप खेलेर आएका खेलाडी हुन् । जसमध्ये पुनम रावलले काँस्य पदक जितेकी थिईन । रावलले जितेको पदक १२ वर्षपछिको नेपालले जितेको पदक हो । १२ वर्ष पहिला हालका आईबा थ्री स्टार कोच दिपक महर्जनले काँस्य पदक जितेका थिए ।

खेलाडीलाई बक्सिङका मुख्य प्रशिक्षक प्रकाश थापामगर र आईबा थ्री स्टार प्रशिक्षक दिपक महर्जनले सातदोबाटोस्थित बक्सिङ प्रशिक्षण हलमा बिहान र साँझ प्रशिक्षण दिईरहेका छन् । च्याम्पियनसिपमा ८३ देशका ३९२ जना खेलाडीहरुले नाम दर्ता गराईसकेका छन् ।

च्याम्पियनसिपमा प्रथम, दोस्रो र तेस्रो हुनेले क्रमशः १ लाख, ५० हजार र २५ हजार अमेरिकी डलर नगद पुरस्कार पाउने छ । आसन्न १९औँ एशियन गेम्स (एसियाड) को तयारीको लागि यने प्रतियोगिता अति महत्वपूर्ण हुने संघले विश्वास लिएको छ ।