काठमाडौंं (हाम्रो खेलकुद) – राष्ट्रिय खेलकुद परिषद् (राखेप) का सदस्यसचिव टंकलाल घिसिङले राष्ट्रिय खेलाडी कल्याणकारी कोषलाई सोमबार आर्थिक सहयोग प्रदान गरेका छन् ।

नेपाल राष्ट्रिय तथा अन्तर्राष्ट्रिय खेलाडी संघका अध्यक्षसमेत रहेका कोषका सदस्यसचिव दीपक श्रेष्ठलाई सदस्यसचिव घिसिङले २ लाख ९ हजार १ सय १४ रुपैयाँ बराबरको चेक एक कार्यक्रमबीच हस्तान्तरण गरेका हुन् ।

करिब ४ महिना बराबरको आफूले पाउने सुविधावापतको रकम सदस्यसचिव घिसिङले कोर्षलाई प्रदान गरेका हुन् । नेपाल सरकारले घिसिङलाई गत मंसिर १३ गते राखेपको सदस्यसचिवमा नियुक्त गरेको थियो ।

घिसिङको नियुक्तिका साथै राखेपका तत्कालीन सदस्यसचिव रमेशकुमार सिलवालले आफ्नो बर्खास्ती विरुद्ध सर्वोच्च अदालतमा रिट दायर गरेपछि सर्वोच्चको अल्पकालीन अन्तरिम अनुसार करिब ४ महिना सदस्यसचिव घिसिङ राखेपमा अनुपस्थित थिए ।

सर्वोच्चले गत चैत २२ गते सिलवालको रिट खारेज गरेपछि सदस्यसचिव घिसिङ पुनः राखेपमा फर्केका थिए । त्यही अनुपस्थित भएको अवधिको सुविधा वापतको रकम सदस्यसचिव घिसिङले कोषलाई हस्तान्तरण गरेका हुन् ।

कार्यक्रमलाई सम्बोधन गर्दै सदस्यसचिव घिसिङले ‘काम गर्न नपाएको अवधिको सुविधा लिन त्यत्ति सहज नलागेको र खेलाडीकै हितलाई सम्झेर थोरै भएपनि कोष सहयोग होस् भनेर उपलब्ध गराएको बताए ।

उनले कोषलाई बलियो बनाउन कार्य योजना बनाएको र कोषलाई ठूलो बनाउन सबैले आ–आफ्नो ठाउँबाट सहयोग गर्ने थपे । अध्यक्ष श्रेष्ठले सहयोगले सकारत्मक सन्देश प्रवाह गर्ने बताउदै यसले अरुलाई पनि कोषमा सहयोग गर्न आकर्षित गर्ने धारणा व्यक्त गरे ।