काठमाडौं (हाम्रो खेलकुद) – एडभान्स एकेडेमीले प्याट्रिएट्स कप अन्तरकलेज टी–२० क्रिकेट प्रतियोगितामा लगातार दोस्रो जित निकालेको छ । हिमालयन ह्वाइट हाउस कलेजलाई ७ विकेटले पराजित गर्दै एडभान्सले लगातार दोस्रो जित दर्ता गरेको हो ।

मुलपानीमा मंगलबार भएको खेलमा १ सय ३० रनको लक्ष्य एडभान्सले १९ ओभर ३ बलमा ३ विकेट गुमाएर पुरा ग¥यो । एडभान्सको जितमा दिपेश दासले अविजित ३२ रनको योगदान दिए ।

सक्षम बराकोटीले २८, अभिषेक थापाले २५ तथा तक्षक सिम्खडाले २० रनको योगदान दिए । ह्वाइट हाउसका निश्चय थापा, नितेश कुमार यादव र आदर्श झाले समान एक विकेट लिए ।

त्यसअघि टस जितेर पहिलो ब्याटिङ गरेको ह्वाइ हाउसले निर्धारित २० ओभरमा ६ विकेट गुमाएर १ सय २९ रनको मध्यम योगफल तयार पारेको थियो । ह्वाइट हाउसका निश्चय थापले ५२ बलमा ५० रनको अर्धशतकीय इनिङ्स खेले । आदर्श झाले १८ रन बटुल्दा आदित्य मल्लले १३ तथा सतिश यादवले १० रन जोडे ।

एडभान्सका असिम श्रेष्ठले आफ्नो स्पेलको ४ ओभरमा ९ रन खर्चिएर ३ विकेट लिए । विपरल खतिवडा र अभिषेक थापाले समान एक विकेट लिए । एडभान्सका असिम श्रेष्ठ प्लेयर अफ दि म्याच घोषित भए ।

लगातार दोस्रो जित निकालेको एडभान्स समूह ‘बी’ मा दुई खेलबाट ४ अंक जोडेर शीर्षस्थानमा रहेको छ । पहिलो हार बेहोरेको ह्वाइटहाउस २ अंक जोडेर दोस्रो स्थानमा रहेको छ । टेक्सासको नि २ अंक छ । ओमेगाले अंकको खाता खोल्न सकेको छैन ।