न्युज २४ लाई मिडिया कप फुटसलको उपाधि

काठमाडौं (हाम्रो खेलकुद) – प्रथम एफएनजे मिडिया कप फुटसलको उपाधि न्युज २४ टेलिभिजनले जितेको छ । ललितपुरको च्यासलस्थित नेसनल स्पोर्ट्स सेन्टरमा मंगलबार भएको फाइनलमा पत्रकार महासंघको ललितपुर शाखालाई ५–२ ले पराजित गर्दै न्युज २४ ले उपाधि जितेको हो ।

मंगलबार नै सेमिफाइनलमा न्युज २४ ले पत्रकार महासंघको कास्की शाखालाई ७–२ ले तथा पत्रकार महासंघको ललितपुर शाखाले शिलापत्र डटकमलाई पराजित गर्दै फाइनलको यात्रा तय गरेका थिए ।

उपाधिसँगै न्युज २४ ले २५ हजार नगदसहित ट्रफी र मेडल हात पारेको छ । उपविजेता ललितपुर शाखाले १५ हजार रुपैया प्राप्त गरेको छ ।

दुई दिने प्रतियोगितामा १६ टोलीको सहभागिता जनाएको थियो । खेलहरु नकआउटका आधारमा भएका थिए । न्युज २४ का सुरज मर्हजन उत्कृष्ट खेलाडी तथा न्युज २४ कै प्युसबहादुर श्रेष्ठ उत्कृष्ट गोलरक्षक बने । उनीहरुले समान २ हजार ५ सयसहित ट्रफी पाए ।

नेपाल पत्रकार महासंघले आफ्नो ६७औं स्थापना दिवसको अवसरमा ‘मिडिया कप फुटसल’ प्रतियोगिता आयोजना गरेको हो ।