काठमाडौं (हाम्रो खेलकुद) – दोस्रो संस्करणको योनेक्स सनराइज प्रधानमन्त्री कप राष्ट्रिय खुला र्‍याङकिङ ब्याडमिन्टन सोमबारदेखि काठमाडौंमा सुरु हुने भएको छ ।

आयोजक अपी स्पोर्ट्स म्यानेजमेन्ट र हरिलाल धर्मदेवी मेमोरियल ट्रष्टले शनिबार राजधानीमा पत्रकार सम्मेलनको आयोजना गर्दै प्रतियोगिता २८ चैतदेखि २०७९ १ वैशाखसम्म हुने जानकारी गराएको हो । प्रतियोगिता त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा हुनेछ ।

प्रतियोगितामा राष्ट्र भरिका विभिन्न जिल्ला, क्लब तथा तीन विभागिय टोली नेपाली सेना, नेपाल प्रहरी र सशस्त्र प्रहरी बलको एपिएफ क्लब गरि करिव ३०० खेलाडीहरुको सहभागिता रहने आयोजकले अनुमान गरेको छ ।

प्रतियोगितामा पुरुष एकल (खुला), महिला एकल (खुला), पुरुष युगल (खुला) यु–१५ पुरुष, यु–१५ महिला, यु–१९ पुरुष, यु–१९ महिला, मास्टर्स खुला ४५ वर्ष माथि र मास्टस खुला ५५ बर्ष माथि गरि कुल ९ विधामा प्रतिस्पर्धा हुनेछ । प्रतियोगिता विश्व व्याडमिन्टन महासंघ (बिडब्लुएफ) तथा नेपाल व्याडमिन्टन संघको प्राविधिक सहयोग रहेको छ ।

पुरुष एकल र महिला एकलको विजेताले १ लाख १५ हजार दोस्रो हुनेले ५५ हजार र तेस्रो हुनेले समान १५ हजार प्राप्त गर्नेछन् । यस्तै यु–१५ को ब्वाइज र गल्सको विजेताले १० हजार, दोस्रोले ५ हजार तथा तेस्रो ले समान ३ हजार प्राप्त गर्नेछन् । यु–१९ को ब्वाइज रगल्सको विजेताले समान १५ हजार, दोस्रोले ७ हजार र तेस्रो हुनेले ३ हजार ५ सय प्राप्त गर्नेछन् ।

पुरुष युगलको विजेताले ५० हजार, दोस्रोले २५ हजार र तेस्रो हुनेले समान १० हजार प्राप्त गर्नेछन् । मास्टर्स खुला ४५ वर्षमाथि र मास्टर्स खुला ५५ वर्षमाथिको विजेताले समान ३५ हजार, दोस्रो हुनेले २० हजार र तेस्रो हुनेले समान १० हजार पाउने आयोजकले जनाएको छ ।

प्रतियोगिताको मुख्य प्रायोजकमा टाइगर ब्रुअरीको अन्नपूर्ण रहेको छ । खेल सामाग्री उत्पादन गर्ने विश्वविख्यात कम्पनी योनेक्स सनराईजको पनि साथ रहेको छ । बेभरेज पार्टनर आरसिबोला, प्रमोटरमा १०० स्पोर्टस तथा खेतान स्पोर्टस फाउण्डेशन तथा टिकेटिङ पार्टनर सजिलो पे रहेका छन् ।