विस्केक (हाम्रो खेलकुद) – नेपाली राष्ट्रिय फुटसल टोलीले मैत्रीपूर्ण खेलमा कीर्गिस क्लब डोर्डाेइ डाइनामोसँग हार बेहोरेको छ । नेपालले सुरुवाती अग्रता जोगाउन नसक्दा ३–१ को हार बेहोरेको हो ।

खेलको छैटौं मिनेटमा विजय श्रेष्ठको गोलबाट नेपालले सुरुवाती अग्रता लिएको थियो । पहिलो हाफको अन्तिम मिनेट बाँकी छँदा डोर्डोइका अरापोभ कुबातले बराबरी गोल फर्काए । दोस्रो हाफमा डोर्डोइले दुई गोल थप्दै जित पक्का ग¥यो । डोर्डाेइका एन्डाविकोध र सुलिमानुभ ऐदरले गोल गर्र्दै जित पक्का गरे ।

कीर्गिस्तानको पुरानो मध्येको क्लब डोर्डोइले यसअघिको मैत्रीपूर्ण खेलमा ताजकिस्तानलाई हराएको थियो। नेपाली टोलीका प्रशिक्षक गौरव बस्नेतले डोर्डोइविरुद्धको खेल उपलब्धिमुलक भएको भन्दै नतिजा सुधार्न यसले सहयोग पु¥याउने बताए ।

‘यसअघि खेल खेल्दा हामी सँधै डिफेन्सिभ मात्र खेल्थ्यौं । यसपटक पुरा समय अट्याकिङमा प्रयास ग¥यौं । इरान, ब्राजिललगायतका देशका खेलाडी भएकाले टिम राम्रो रहेछ,’ प्रशिक्षकले बस्नेतले भने, ‘पहिलो पटक अट्याकिङ खेल्दा केही कमजोरी देखियो । यो खेलले अब आउने खेलमा सुधार गर्न सहयोग मिल्नेछ ।’

नेपालले एएफसी फुटसल एसियन कप क्वालिफायर्समा अप्रिल १० मा उज्बेकिस्तान, अप्रिल ११ मा ताजकिस्तान र अप्रिल १२ मा अफगानिस्तानसँग खेल्नेछ ।