काठमाडौं (हाम्रो खेलकुद) – प्रभात बोर्डिङ स्कुलकी क्यारिना सुवाल र प्रोक्सिमाकी नर्वदा खाइटुले केबी साम ११औं पुर्णमान वज्राचार्य स्मृति राष्ट्रिय खुला टेबलटेनिस प्रतियोगितामा सोमबार स्वर्ण जितेका छन् ।

गल्र्स सिंगल्सको यु–१४ मा क्यारिना र यु–१२ मा नर्वदा पहिलो भएका हुन् । केबी साम अल्मुनियम इन्डस्ट्रिज प्रालिको मुख्य प्रायोजनमा काठमाडौं जिल्ला टेबलटेनिस संघद्वारा आयोजित प्रतियोगिताको यु–१४ फाइनलमा क्यारिनाले आदर्श विद्या मन्दिर (एभीएम) की आश्मा पहारीलाई ३–० को सोझो सेटमा पराजित गरिन् ।

विजेश्वरी बोर्डिङ स्कुलकी अनामिका कस्ती र श्रृजना ज्ञान सागर स्कुलकी वर्षा अधिकारी संयुक्त रुपमा तेश्रो भए । लैनचौरस्थित राष्ट्रिय टेबलटेनिस प्रशिक्षण केन्द्रमा भएको यु–१२ को उपाधि भिडन्तमा नर्वदाले आवर होम बोर्डिङ स्कुलकी सुलेखा ठाकुरलाई ३–१ ले हराइन् ।

ज्ञान सागरकी विपिना थापा र प्रोक्सिमाकी प्रज्ञा भेले तेश्रो बने । प्रतियोगिताको राष्ट्रिय खेलकुद परिषद्का निमित्त सदस्य–सचिव कुलबहादुर थापा र केबी सामका अध्यक्ष कमलकुमार बेगानीले संयुक्त उद्घाटन गरे ।

प्रतियोगितामा पुरुष÷महिला सिंगल्ससहित विभिन्न ३४ स्पर्धामा ३ सय ५० खेलाडीको सहभागिता रहेको आयोजक संघका अध्यक्ष धर्ममान वज्राचार्यले जनाएका छन् । पुरुष-महिला सिंगल्स विजेताले ५० हजार, उपविजेताले २५ हजार र तेश्रोले १५-१५ हजारका दरले नगद पुरस्कार प्राप्त गर्ने छन् । ‘सबैका लागि टेबलटेनिस’ भन्ने नारा साथ सञ्चालित प्रतियोगिता शनिबार सम्पन्न हुने छ ।