काठमाडौं (हाम्रो खेलकुद) – नेपाल ओलम्पिक कमिटी (एनओसी) को आयोजनामा बुद्ध जन्मभूमि लुम्बिनीमा ‘इन्टरनेसनल डे अफ स्पोर्टस फर डेभलपमेन्ट एन्ड पिस’ आयोजना हुने भएको छ ।

एनओसीले आइतबार आफ्नै बिल्डिङ सातदोबाटोको पत्रकार सम्मेलनको आयोजना गर्दै ‘इन्टरनेसनल डे अफ स्पोर्टस फर डेभलपमेन्ट एन्ड पिस’ आगमी बुधबार अर्थात २३ चैतमा हुने जानकारी गराएको हो ।

यसलाई लुम्बिनी प्रदेश सरकार र लुम्बिनी विकास कोषको सहयोग रहने एनओसीले जनाएको छ । अन्तर्राष्ट्रिय ओलम्पिक कमिटीको प्रस्तावमा संयुक्त राष्ट्र संघले सन् २०१३ मा अप्रिल ६ को दिन ‘इन्टरनेसनल डे अफ स्पोर्टस फर डेभलपमेन्ट एन्ड पिस’ पारित गरेको थियो ।

यस दिनमा विश्वभर नै विविध कार्यक्रम हुदै आउदा नेपालमा पनि सन् २०१४ देखि यो कार्यक्रम मनाइदै आएको छ । कोभिड महामारीका कारण पछिल्लो दुई वर्ष यो कार्यक्रम आयोजना हुन नसकेको र यसवर्ष पनि त्यसको असर रहेकाले यो वर्ष वाकाथनसँगै दीप प्रज्वलन हुने एनओसीका अध्यक्ष जीवनराम श्रेष्ठले जानकारी गराए ।

‘हामीले पिस म्याराथनसँगै छोटो दुरीका म्याराथन आयोजना गर्ने लक्ष्य लिएको थियौं । कोभिडका कारण यो वर्ष त्यो सम्भव हुन सकेन । अर्काे वर्षदेखि यसलाई निरन्तरता दिने लक्ष्यमा छौं । पिस म्याराथनलाई प्रतिष्ठित म्याराथन बनाउने लक्ष्यमा छौं ।’ कार्यक्रममा अध्यक्ष श्रेष्ठले भने, ‘यसपटक नेपाल लुम्विनी र बुद्धको जन्मस्थललाई वाकाथन र दीप प्रज्वलनबाट विश्वभर नै राम्रो सन्देश प्रवाह हुनेमा विश्वस्त छौं ।’

लुम्बिनीलाई नै यस कार्यक्रमका लागि रोज्नुमा पहिलो कारण लुम्बिनी शान्तिका प्रतीक गौत्तम बुद्धको जन्मस्थान र दोस्रो कारण लुम्बिनीलाई अन्तर्राष्ट्रिय रूपमा प्रचार प्रसार गर्न सक्छौं भन्ने उद्देश्य रहेको एनआसीले जनाएको छ । लुम्बिनी प्रदेशका मुख्यमन्त्री कुलबहादुर केसीले शान्तिदीपमा कार्यक्रमको उद्घाटन गर्नेछन् ।

त्यसपछि वाकथलन हुनेछ । त्यसपछि नेपाल ओलम्पिक कमिटीका अध्यक्ष जीवनराम श्रेष्ठले कार्यक्रमको महत्वबारे प्रकाश पार्नेछ । यस्तै मुख्यमन्त्री केसी र लुम्बिनी प्रदेशका शिक्षा, विज्ञान तथा खेलकुद मन्त्री मानयीय वसिउद्दिन खानले आप्mनो मन्तब्य दिनु हुनेछ । कार्यक्रममा लुम्बिनी विकास कोषका उपाध्यक्ष तथा भिक्षु मैत्तेयले विश्व शान्तिबारे प्रवचन दिने कार्यक्रम रहेको छ । अन्त्यमा दीप प्रज्वलन हुनेछ ।