काठमाडौं (हाम्रो खेलकुद) – नेपाल ट्राईयाथलन संघको आयोजनामा पोखरामा भएको एशिया ट्राईयाथलन कपको उपाधि पुरुषतर्फ जापानका जेन्टा युचिदा र महिलातर्फ काजाकिस्तानकी इकातेरिना सावालिनाले उचालेका छन् ।

७५० मिट पौडी, २० साईक्लिङर ५ किमि दौडको दुरी जेन्टाले ५३ मिनेट १४ सेकेन्ड तथा इकातेरिनाले १ घन्टा ०२ मिनेट २० सेकेन्डमा पुरा गर्दै उपाधि उचालेका हुन् । पुरुषतर्फ जापानकै क्योतारो ओसिकावा दोस्रो र अष्ट्रियाका लिओन पगर तेस्रो भए ।

जापानको टिएनटि टिभि र टिभिएस अपाचेको प्रायोजन रहेको प्रतियोगिताको महिलातर्फ जापानकी हिराकु फुकुओका दोस्रो तथा काजाकिस्तानकी नादेज्दा बेक्मागन बेताभाले १ तेश्रो भईन् । शीर्ष तीन स्थान प्राप्त गर्ने खेलाडीहरुले मेडल, ट्रफी, प्रमाण पत्रका साथै नगद ६३० डलर, ५२५ डलर र ४२० डलर प्राप्त गरे । यस्तै चौथोले ३१५ डलर र पाँचौले २१० डलर प्राप्त गरे ।

आदर्श र प्रग्न्यालाई दक्षिण एशियाली उपाधी

सोही क्रममा भएको दक्षिण एशियाली ट्राइयाथलन च्याम्पियनसिपको उपाधी भारतका आदर्श मुरलीधरण नायर सिनिमोल र प्रज्ञा मोहनले प्राप्त गरेका छन् । आदर्शले ५९ मिनेट १० सेकेन्डमा दुरी पुरा गर्दै उपाधि जिते । यस्तै पहिलो संस्करणकी बिजेता प्रग्न्याले १ घन्टा ६ मिनेट २२ सेकेन्डमा दुरी पुरा गर्दै उपाधि जितिन् । उनले आफ्नो समयमा अघिल्लो संस्करणमा भन्दा ३ मिनटले सुधार गरेकी हुन् ।

भारतिय खेलाडीहरुको दवदवा रहेको स्पर्धामा राहुल धनजी सिन्धेले ५९ मिनेट ४२ सेकेन्डका साथ रजत र विश्वनाथ यादवले ५९ मिनेट ४३ सेकेन्डका साथ कास्य पाए । यस्तै महिलातर्फ मानषी मोईतेले १ घन्टा ८ मिनेट १८ सेकेन्डका साथ रजत र संजना जोशीले १ घन्टा १० मिनेट ८ सेकेन्डका साथ कास्य पाईन् ।

राष्ट्रियमा बसन्त र सोनीले जिते

राष्ट्रियतर्फको प्रतिस्पर्धामा सेनाका बसन्त थारु र एपिएफकी सोनी गुरुङले स्वर्ण हात पारे । थारुले १ घन्टा ३ मिनेट २ सेकेन्डमा दुरी पुरा गरे भने सोनीले १ घन्टा ११ मिनेट १७ सेकेन्डमा दुरी पुरा गरिन् ।

दोश्रो स्थानमा रहेका दिपेश चौधरीले १ घन्टा ५ मिनेट ६ सेकेन्ड र तेश्रो स्थानमा रहेका मुकेश थारुले १ घन्टा ७ मिनेट ५५ सेकेन्डमा दुरी पुरा गरे । यस्तै महिलातर्फ केशरी थापा मगरले १ घन्टा २१ मिनेट २ सेकेन्डका साथ रजत र सस्तिका भण्डारीले १ घन्टा ३२ मिनेट ११ सेकेन्डका साथ कास्य पाए ।

प्रतियोगितामा जापान, अष्ट्रिया, पोल्याण्ड, काजाकिस्तान, भारत, बंगलादेश र नेपाल गरि ७ राष्ट्रका पुरुष तर्फ ३७ र महिला तर्फ २० गरि ५७ खेलाडीहरुले सहभागिता जनाएका थिए । बिजयी खेलाडीहरुलाई युवा तथा खेलकुद मन्त्री महेश्वर जंग गहतराज अथक, राखेपका निमित्त सदस्य सचिव कुलबहादुर थापा, सदस्य राजेश गुरुङ्ग, गण्डकी प्रदेश सदस्य सचिव तेज गुरुङ, प्रदेश साँसद एवं संघका उपाध्यक्ष दीपक कोईराला लगायतले पुरस्कार वितरण गरेका थिए ।