काठमाडौं (हाम्रो खेलकुद) – नेपाली महिला राष्ट्रिय भलिबल टिमकी कप्तान अरुणा शाही र गण्डकी प्रदेशका घनश्याम चौधरीले मनोरन्जन रमण शर्मा अवार्ड प्राप्त गरेका छन् ।

नेपाल भलिबल संघका अध्यक्षसमेत रहेका मनोरन्जन रमण शर्माले स्थापना गरेको अवार्डमा यसवर्ष पुरुषतर्फ घनश्याम र महिलातर्फ अरुणालाई प्रदान गरिएको हो । अवार्डसँगै अरुणा र घनश्यामले समान ४०–४० हजार रुपैया प्राप्त गरे । अरुणा र घनश्यामलाई अध्यक्ष शर्मा र राष्ट्रिय बाणिज्य बैंकका सिईओ किरण श्रेष्ठले उनीहरुलाई नगद प्रदान गरे ।

अरुणाको कप्तानीमा नेपालले गत पुसमा बंगलादेशमा भएको एसियन सिनियर सेन्ट्रल जोन पुरुष तथा महिला भलिबल च्यालेन्ज कपको उपाधि जितेको थियो । उनी नेपाली भलिबललाई स्वर्ण दिलाउने पहिलो कप्तान हुन् ।

उनकै कप्तानीमा नेपालले सन् २०१९ मा बंगलादेशमा भएको पहिलो सेन्ट्रल जोन तथा सोही वर्ष नेपालमै भएको १३औं दक्षिण एसियाली खेलकुद (साग) मा ऐतिहासिक रजतपदक दिलाएकी थिइन् ।

गण्डकी प्रदेशकी अरुणाले पछिल्लो समय काठमाडौंको होङ्गान्जी न्यु डायमन्ड स्पोर्ट्स क्लबबाट घरेलु भलिबल खेल्दै आएकी थिइन् । अरुणाले डायमन्डबाट पनि थुप्रै उपाधि जितिसकेकी छिन् । पछिल्लो समय उनले गण्डकी प्रदेशबाटै खेल्ने निर्णयक गरेकी छिन् । गत पुस र माघमा पोखरामा भएको दोस्रो संस्करणको टाइगर कपमा आयोजकको टोलीबाट खेलेकी थिइन् ।

यस्तै घनश्याम गण्डकी प्रदेशका नियमित सदस्य हुन् । संघले २०७७ मा राष्ट्रिय स्तरमा विभिन्न क्लब, जिल्ला, प्रदेश एवम् संघद्धारा आयोजना गरिएको राष्ट्रिय भलिबल प्रतियोगिताहरुमा सहभागी भई उच्च स्तरको प्रदर्शन गरेको आधारमा सम्मान गरिएको जनाएको छ ।

राष्ट्रिय टोलीमा स्थान बनाउन नसकेपनि उनले घरेलु भलिबलमा लगातार उच्च प्रदर्शन गर्दै आएका छन् । गण्डकी प्रदेशले गत वर्ष पहिलो टाइगर कपको उपाधि जित्दा उनी टोलीका मुख्य सदस्य रहेका थिए ।

भलिबल नेपालको राष्ट्रिय खेल घोषणा भएपछि शर्माले १० लाखको अक्षय कोष स्थापना गरेका थिए । त्यस अक्षय कोषबाट आएको ब्याज रकमलाई शर्माले अवार्डको नाममा एक पुरुष र एक महिला खेलाडीलाई प्रदान गर्दै आईरहेका छन् ।