काठमाडौं (हाम्रो खेलकुद) – नवलपुरका आकाश राना र कास्कीका सरोज गुरुङ गणेशमान सिंह स्मृति बक्सिङ प्रतियोगिताअन्तर्गत गण्डकी प्रदेशस्तरीय छनोटको फाइनलमा पुगेका छन् ।

मंगलबार पोखरामा सुरु भएको छनोट प्रतियोगिताअन्तर्गत पुरुष ५२ केजी तौल समूहमा आकाशले पर्वतका ओमन गुरुङ र सरोजले तनहुँका अनिश गुरुङलाई पराजित गर्दै फाइनलमा पुगेका हुन् ।

यसैगरी पुरुष ५७ केजीमा स्याङ्जाका शंकर खनाल र कास्कीका सौगात कुमाल, ६३ केजीमा पर्वतका निश्चल गुरुङ र कास्कीका सागर परियार, ६९ केजीमा पर्वतका सुनील विक र कास्कीका कुशल कुमाल, ७५ केजीमा कास्कीका मन गुरुङ र निशान गुरुङ तथा ९१ केजीमुनिको तौल समूहमा पर्वतका किरण विक र कास्कीका आयुष थापा आ–आफ्नो प्रतिद्वन्द्वीलाई पराजित गर्दै फाइनलमा पुगेका छन् । पुरुषको ८१ केजीमा पर्वतका मनिष बिसी छनोट भएका छन् ।

यसैगरी महिलाको ५१ केजी तौल समूहमा पर्वतकी अस्मिता थापा, ५७ केजीमा पर्वतकै सीमा गुरुङ र ६० केजी तौल समूहमा पर्वतकै जेसिका श्रेष्ठ राष्ट्रिय प्रतियोगिताका लागि छनोट भएका छन् ।

वीर गणेशमान सिंह स्पोर्ट्स कमिटीको आयोजना र राष्ट्रिय खेलकुद परिषद्को विशेष सहयोगमा २०७९ बैशाख ६ देखि १० गतेसम्म काठमाडौंको बसन्तपुर डबलीमा हुने वीर गणेशमान सिंह स्मृति राष्ट्रिय बक्सिङ प्रतियोगिताका लागि खेलाडी छनोट गर्न गण्डकी प्रदेशस्तरीय प्रतियोयिगता आयोजना गरिएको हो ।

तेस्रो संस्करणको प्रतियोगितामा पुरुषतर्फ सात र महिलामा पाँच तौल समूहमा प्रतिस्पर्धा हुनेछ । प्रतियोगितामा पुरुषतर्फ ४८, ५२, ५७, ६३, ६९, ७५ र ८१ तौल समूहमा प्रतिस्पर्धा हुनेछ । यसैगरी महिलातर्फ ४८, ५४, ५७, ६४, ६९ केजी तौल समूहमा प्रतिस्पर्धा हुनेछ । प्रतियोगितामा सात प्रदेश र तीन विभागीय टोलीका खेलाडीहरूबीच प्रतिस्पर्धा हुनेछ ।

राष्ट्रिय प्रतियोगितामा हरेक तौल समूहमा पहिलो, दोस्रो र तेस्रो स्थान हासिल गर्ने खेलाडीले आकर्षक नगद पुरस्कार प्राप्त गर्ने छन् भने उत्कृष्ट महिला र पुरुष खेलाडीले स्कुटर र मोटरसाइकल पाउने छन् ।