काठमाडौं (हाम्रो खेलकुद) – ढुकु फुटसल हवले महिला प्रिमियर लिग (एमपिएल) फुटसल सिजन चारमा आफ्नो अपराजित यात्रालाई कायमै राख्न सफल भएका छन् ।

लिगको चौथो साताको खेलमा ढुकुले दि माइथी महिलाजमाथि ६–१ को फराकिलो जित दर्ता गर्दै लिगमा अपराजित रहन सफल भएको हो ।
यो जितसँगै शीर्षस्थानमा रहेको ढुकुको ५ खेलबाट १५ अंक पुगेको छ । पराजित दि माइथी महिलाज ५ खेलबाट ६ अंक जोडेर पुछारमा रहेको छ ।

एमपिएलकै अर्काे खेलमा सम्झना शर्मा र योन्जोम रोकायाको ह्याट्रिक मद्दतमा मेगा पावरले बार्सा नेपालमाथि ९–० को फराकिलो जित दर्ता गरेको छ । यो जितसँगै मेगा पावर ५ खेलबाट १३ अंक जोडेर दोस्रो स्थानमा रहेको छ । पराजित बार्सा नेपाल ५ खेलबाट ७ अंक जोडेर सातौ स्थानमा रहेको छ ।

यस्तै स्टुडेन्ट एफसीले फुटसल ५ लाई ६–१ को फराकिलो गोलअन्तरले पराजित गरेको छ । यो जितसँगै स्टुडेन्ट एफसी ५ खेलबाट ९ अंक जोडेर चौथो स्थानमा उक्लिन सफल भएको छ । समान ९ अंक नै रहेपनि पराजित फुटसल ५ छैटौं स्थानमा झरेको छ ।

यस्तै क्रिजल एफसीले विप्ले कुमारीलाई ६–० ले पराजित गरेको छ । यो जितसँगै क्रिजल एफसी ५ खेलबाट १२ अंक जोडेर तेस्रो स्थानमा यथावत रहेको छ । विप्ले ९ अंक जोडेर पाँचौ स्थानमा झरेको छ ।

एमपिएल दि वि युनाइटेड प्रोजेक्टद्धारा सञ्चालित नेपालको पहिलो महिला फुटसल लिग हो । यो पूर्णरुपमा महिलाहरुद्धारा सञ्चालित लिग हो । जहाँ महिलाले खेल्ने र महिलाले खेलाइने छ । यहाँ ८० भन्दा बढी महिला रहेका छन् ।

एमपिएलमा ८ टोलीको सहभागिता रहेको छ । लिगका खेल हरेक शनिबार ९ अप्रिलसम्म खेलाइनेछ । ८ टोलीले ६ साताको अवधिमा एक अर्कासँग खेल्नेछ । प्रत्येक जित, बराबरी र हारमा टोलीलाई अंक प्रदान गरिनेछ । बढी अंक बटुल्ने शीर्ष तीन टोलीलाई विभिन्न प्रायोजकहरुले प्रदान गरेको पुरस्कार प्रदान गरिनेछ ।