भक्तपुर (हाम्रो खेलकुद) – भक्तपुर जिल्ला खेलकुद विकास समितिले चाँगुनारायण नगरपालिकासंग कार्यलय भवन निर्माणका लागि आवश्यक पर्ने जग्गा उपलब्ध गराउन अनुरोध गरेको छ ।

नगर प्रमुख सोमप्रसाद मिश्रलाई समितिका कार्यलय प्रमुख दुर्गाप्रसाद दुलालले नगरपालिकाको कार्यलयमा अनुरोध पत्र बुझाएका छन् ।समितिका निवर्तवान अध्यक्ष श्रीभक्त कासिछ्वाको पहलमा चाँगुनारायण नगरपालिका ५ बाँसवारीस्थित साझा सुविधा केन्द्रसँगै रहेको करिब ५ रोपनी सार्वजनिक जग्गा भक्तपुर जिल्ला खेलकुद विकास समितिको नाममा दर्ता रहने गरी जग्गा उपलब्ध गराउन माग गरिएको हो ।

पत्र हस्तान्तरण पश्चात नगर प्रमुख मिश्रले सकारात्मक रहेको र पत्रलाई आवश्यक प्रक्रियाका लागि अगाडि बढाउने बताए । ‘चाँगुनारायण नगरपालिका खेलकुदको विकास र विस्तारका लागि हातेमालो गर्न इच्छुक छ । हामीले एक वडा एक खेल मैदानको निति लिएर खेलकुदको विकासका लागि पूर्वाधार निर्माण गर्दै आएका छौं । अन्तर्राष्ट्रिय मापदण्डको रंगशाला र कभर्डहल निर्माण प्रक्रियामा छ ।’ नगरप्रमुख मिश्रले भने ।

समितिका निवर्तमान अध्यक्ष कासिछ्वाले जग्गा उपलब्ध गराउन अनुरोध गर्दै यो आफु अध्यक्ष हुँदाको सपना नै रहेको बर्ता । समितिले माग गरेको जग्गा चाँगुनारायण नगरपालिका छेउ नगरकोट जाने मुख्य सडकमा रहेको छ । कार्यलय भवनका लागि अति उपयुक्त स्थानमा रहेको समितिका कार्यालय प्रमुख दुर्गाप्रसाद दुलालले जनाएका छन् ।