काठमाडौं (हाम्रो खेलकुद) – राष्ट्रिय च्याम्पियन एपिएफका दिपेश धामी र सेनाकी रशिला महर्जनले प्रथम राष्ट्रब्यापी भक्तपुर खुला ब्याडमिन्टन च्याम्पियनसिपको उपाधि जितेका छन् ।

पुरुष एकलतर्फ राष्ट्रिय च्याम्पियन धामीले रिभाईभ लिजर पार्कका बिश्व जुनियर नम्बर एक खेलाडी प्रिन्स दाहाललाई २१–१५, १२–२१ र २१–१२ को अन्तरमा पराजित गर्दै उपािध उचालेका हुन् । पुलिसका जीवन आचार्य र बिष्णु कटुवाल तेस्रो भए ।

भक्तपुर जिल्ला ब्याडमिन्टन संघको आयोजनामा भएको च्याम्पियनसिपको महिला एकलतर्फ राष्ट्रिय च्याम्पियन तथा बिश्व जुनियर युगल तर्फ उच्च ७ मा रहेकी सेनाकी रशिला महर्जनले सेनाकै अनुमाया राईलाई २१–९ र २१–१९ ले पराजित गर्दै उपाधि जितिन् । सेनाकी अमिता गिरी र पुलिसकी निता लम्साल तेस्रो भइन् ।

नेपाल ब्याडमिन्टन संघको तत्वावधानमा भएको च्याम्पियनसिपको पुरुष युगलतर्फ सेनाका प्रफुल महर्जन र रुकेश महर्जनको जोडीले बाजी मारे । उक्त जोडीले कास्कीका भुगोल गुरुङ र बिधान अधिकारीको जोडीलाई २१–१७ र २१–१३ ले पराजित गरे । एपिएफका दिपेश धामी र बिजित थापा मगर तथा १६ फिदरका क्षितिज खनाल र सुजन थापाको जोडी तेस्रो भए ।

लिवालिस्थित कभर्डहलमा यु–१५ छात्रा एकलतर्फ बेलटार ब्याडमिन्टन एकेडेमीकी रोजी राईले काठमाडौ ब्याडमिन्टन एकेडेमी (केविए) की एञ्जेल लिम्बुलाई २१–१४ र २१–१४ ले पराजित गर्दै पहिलो भइन् । सेनाकी रोज पाण्डे र १६ फिदरकी रिहाना शेरचन तेस्रो भइन् । छात्र एकलतर्फ सिल्क ग्रुपका कबिर केसीले एनआरएनका शाहिल चन्द २१–१५ र २१–१६ ले हराएर स्वर्ण जिते । कपिलबस्तुका रोहित बराल र अभय महरा तेस्रो भए ।

मास्टर्स युगल ४५ तर्फ कास्कीका नरबहादुर गुरुङ र शम्भु श्रेष्ठको जोडीले गठ्ठाघर स्पोर्टस् क्बलका पूर्णहरि होना र संजीव कपालीको जोडीलाई २१–१५ र २१–१७ ले पराजित गर्दै स्वर्ण हात पारे । जेष्ट ब्याडमिन्टनका श्याम पराजुली र नविन बाबु श्रेष्ठ तथा चन्द्रागिरीका राम केसी र हरि खत्रीको जोडी तेस्रो भए ।

बिजयी खेलाडीहरुलाई संघिय सांसद प्रेम सुवाल, नेपाल ब्याडमिन्टन संघका अध्यक्ष रामजी बहादुर श्रेष्ठ, उपमेयर रजनी जोशी लगायतले पुरस्कृत गरे ।

च्याम्पियनसिपमा यु–१५ पुरुष-महिला सिंगल्समा शीर्ष स्थान हात पार्नेले क्रमशः १५ हजार, १० हजार र ७ हजार ५ सय नगद पुरस्कार प्राप्त गरे । पुरुष-महिला सिंगल्सका विजेताले ३५ हजार, उपविजेताले २० हजार र तेश्रोले १२ हजार ५ सयका दरले नगद पुरस्कार हात पारे । भेट्रान ४५ वर्षमाथि डबल्स र पुरुष डबल्समा पहिलो हुनेले ३० हजार, दोश्रोले १५ हजार र तेश्रोले ७ हजार ५ सय नगद पुरस्कार प्राप्त गरे ।

चारदिने च्याम्पियनसिपमा सातै प्रदेशका जिल्ला र तीन विभागीय टोली (आर्मी, पुलिस र एपीएफ) बाट २ सय खेलाडीको सहभागिता रहेको थियो ।