दिपक न्यौपाने, बुटवल

शुद्धोधन गाँउपालिका नवौं फर्साटिकर कप फुटबल प्रतियोगिता शनिबार सुरु हुने भएको छ । प्रतियोगिताको तयारी पूरा भएको बिहीबार आयोजित पत्रकार सम्मेलनमा आयोजक फर्साटिकर युवा क्लबका अध्यक्ष मुकेश कुवरले जानकारी दिए ।

टाईगर्स बु्अरी मुख्य प्रायोजक रहेको प्रतियोगितालाई शुद्धोधन गाउपालिकाबाट समेत सहयोग रहेको कुँवरले बताए । संघिय सरकार, स्थानिय सरकारको सहयोगमा होस्टेल, एकेडेमी र मिनि स्टेडियम निर्माणको तयारी गरि ब्यवस्थित गर्न लागेको अध्यक्ष कुँवरले जनाए । चैत २६ गतेसम्म फर्साटिकर माविको खेलमैदानमा हुने प्रतियोगिताको विजेताले उपाधिसहित २ लाख ५५ हजार ५ सय ५५ रुपैयाँ, कप र दोस्रो हुने टोलीले १ लाख २५ हजार ५ सय ५५ रुपैयाँ प्राप्त गर्नेछ ।

प्रतियोगिताको सर्वोत्कृष्ट खेलाडीलाई १० हजार ५ सय ५५ रुपैयाँ, उत्कृष्ट फरवार्ड, डिफेन्डर, गोलकिपर, सर्वाधिक गोलकर्ता, प्रशिक्षकले समान ५ हजार ५ सय ५५ रुपैयाँ प्राप्त गर्ने प्रतियोगिता संयोजक आशिष केसीले बताए ।

भैरव एफसी, झरना स्पोर्ट्स क्लब, मुर्गिया एफसी, लिस्नु युवा क्लब, कपिलबस्तु युवा क्लब, सुनौलो संगम युवा क्लब, केबिए ग्लोबल भरतपुर एफसी, न्यु युथ युनियन पाल्पा, साविक विजेता फुलबारी गाईज, कालिका स्पोर्ट्स चितवन, फर्साटिकर रातो र निलो गरि १२ टोलीको सहभागिता रहने प्रतियोगिताका प्रचार प्रसार संयोजक टेकु भण्डारीले बताए । उद्घाटन खेल भैरव एफसी र फर्साटिकर निलोबीच हुनेछ । प्रतियोगिताका लागि झण्डै १६ लाख रुपैयाँ खर्च हुने अनुमान गरिएको छ ।