काठमाडौं (हाम्रो खेलकुद) – रिभाईभ लिजर पार्कका प्रिन्स दाहाल र विभागीय नेपाल एपीएफ क्लबका दिपेश धामी प्रथम राष्ट्रब्यापी भक्तपुर खुला ब्याडमिन्टन च्याम्पियनसिपको प्रि–क्वाटरफाइनलमा प्रवेश गरेका छन् ।

विश्व जुनियर नम्बर एक प्रिन्सले १६ फिदरका सुजन थापा माथि २१–३ र २१–११ को सहज जित निकाल्दै अन्तिम १६ मा स्थान पक्का गरेको हो ।भक्तपुर जिल्ला ब्याडमिन्टन संघको आयोजनामा भइरहेको खेलमा एपिएफका दिपेशले काठमाडौं ब्याडमिन्टन एकेडेमी (केविए) का बविश थापामाथि २१–७ र २१–८ को सहज जित निकाल्यो ।

पुलिसका सुनिल जोशी, सेनाका प्रफुल महर्जन, सेनाकै पविन लिनथेप, पुलिसका जीवन आचार्य, बिबिसीका आयुश प्रजापती, एनजेसी डल्लुका स्वर्य मानन्धर, कालिका बिसीका सुदीप सेढाई, पुलिसका पूर्ण बहादुर थापा, सेनाका नविन श्रेष्ठ, पुलिसका हिरा राई, सेनाका रुकेश महर्जन, एपिएफका देवराज राना र पुलिसका बिष्णु कटुवालले पनि अन्तिम १६ मा स्थान बनाएका छन् ।

नेपाल ब्याडमिन्टन संघको तत्वावधानमा भएको च्याम्पियनसिपको महिला एकलतर्फ बिश्व जुनियरको युगलतर्फ सातौमा रहेकी आर्मीकी रशिलाले एनआरएनकी सानिया चन्दलाई २१–१६ र २१–९ ले पराजित गर्दै क्वाटरफाइनलमा स्थान बनाउन सफल भइन् ।

सेनाकी अमिता गिरीले भक्तपुरकी सुभेक्षा श्रेष्ठलाई २१–८ र २१–४ ले पाखा लगाइन् । सेनाकी प्रार्थना देउवाले एपिएफक िशोभा गौचनलाई २१–७ र २१–१०, भोजपुरकी सीता राईले बेलटार ब्याडमिन्टन एकेडेमीकी रोजी राईलाई २१–१७ र २१–१५, पुलिसकी निता लम्सालले काठमाडौ ब्याडमिन्टन एकेडेमीकी अन्जली लिम्बुलाई २१–१० र २१–३ ले हराइन् ।

यस्तै एपिएफकी जेशिका गुरुङले सेनाकी रोज पाण्डेलाई २१–१६ र २१–१४, एपिएफकी सुनयना मुखियाले सेनाकी प्रेक्षा राईलाई २०–२२, २१–१० र २१–१४ तथा सेनाकी अनुमाया राईले १६ फिदरकी रिहाना शेरचनलाई २१–५ र २१–८ ले पराजित गर्दै अन्तिम ८ मा स्थान पक्का गरेका हुन् ।