धनगढी (हाम्रा खेलकुद) – विभागीय नेपाल एपीएफ क्लब र गण्डकी प्रदेश कैलालीको धनगढीमा जारी मुख्यमन्त्री कप राष्ट्रिय पुरुष भलिबल प्रतियोगिताको सेमिफाइनलमा प्रवेश गरेका छन् । योसँगै प्रतियोगिताको सेमिफाइनल समिकरण पूरा भएको छ ।

बिहीबार टोली एपीएफले घरेलु टोली सुदूरपश्चिम प्रदेशलाई ३–० को सोझो सेटले पराजित गर्दै अनितम चारमा स्थान पक्का गरेको हो । एपीएफले सुदूरपश्चिममाथि २५–१३, २५–२० र २५–१२ को सहज जित निकाल्यो । एपीएफका टेकराज अवस्थी खेलको म्यान अफ दि म्याच घोषित भए ।

बिहीबार नै भएको अन्तिम क्वाटरफाइनलमा गण्डकी प्रदेशले बागमती प्रदेशलाई ३–० को सोझो सेटले पराजित गर्दै सेमिफाइनलमा स्थान बनाएको छ । गण्डकीले बागमतीलाई २५–१५, २५–१४ र २५–१८ को सोझो सेटमा जित निकाल्यो । गण्डकीका कप्तान हरि पाण्डे खेलको म्यान अफ दि म्याच घोषित भए ।

शुक्रबार सेमिफाइनल खेल हुनेछन् । फाइनल प्रवेशका लागि त्रिभुवन आर्मी क्लब र एपीएफ तथा नेपाल पुलिस क्लब र गण्डकीबीच खेल हुनेछ । १२ गतेसम्म सञ्चालन हुने प्रतियोगिताको विजेताले ४ लाख रुपैयाँ , उपविजेताले २ लाख, तेस्रो हुने टोलीले १ लाख र चौथो स्थान प्राप्त गर्ने टिमले ५० हजार नगदसहित ट्रफी र मेडल प्राप्त गर्नेछन् ।

प्रतियोगिताको सर्वोत्कृष्ट खेलाडीलाई नगद २० हजार तथा उदियमान खेलाडी, उत्कृष्ट लिफ्टर, उत्कृष्ट स्पाइकर, उत्कृष्ट ब्लकर, उत्कृष्ट डिफेन्सर, उत्कृष्ट सर्वर र उत्कृष्ट प्रशिक्षकलाई जनही १० हजारसहित पुरस्कृत गरिने छ । प्रत्येक खेलका म्यान अफ द म्याचलाई नगद एक हजार पाँच सय नगदसहित पुरस्कृत गरिनेछ ।