काठमाडौं (हाम्रो खेलकुद) – थाइल्यान्डविरुद्धको अन्तर्राष्ट्रिय मैत्रीपूर्ण खेलका लागि नेपालको सुरुवाती ११ घोषणा भएको छ ।

गोलरक्षक किरण कुमार लिम्बुको कप्तानी उत्रने नेपालको रक्षापङ्तिमा अनन्त तामाङ र दिनेश राजवंशीलाई लेफ्ट ब्याकमा एरिक विष्ट र राइट ब्याकमा सुरज ज्यू ठकुरीले साथ दिनेछन् । मिडफिल्डमा पुजन उपरकोटी, तेज तामाङ र सुमन लामा तथा अग्रपङ्तिमा अन्जन विष्ट, आयुष घलान र दर्शन गुरुङ रहेका छन् ।

नेपाल र थाइल्यान्डबीचको खेल चोनबुरी थाइल्यान्डमा नेपाली समयअनुसार साँझ ५ः४५ बजे हुँदैछ । थाइल्यान्डविरुद्धको खेलमा एएफसी कप खेल्ने तयारीमा रहेका लिग च्याम्पियन मछिन्द्र फुटबल क्लब तथा राष्ट्रिय टोलीकै ८ महत्वपूर्ण सदस्य टोलीमा रहेका छैनन् ।

नेपालले सन् १९८७ यता तीन दशकको अन्तरमा थाइल्यान्डविरुद्ध खेल्न लागेको हो । सन् १९८७ मा नेपालले ओलम्पिक छनोटका क्रममा थाइल्यान्डविरुद्ध दुई खेल खेल्दा दुवैमा नेपाल ३–० र २–१ ले पराजित रहेको थियो ।

थाइल्यान्डसँगको खेलपछि नेपालले १३ चैतमा थाइल्यान्डको चोनबुरी एफसीसँग प्रतिस्पर्धा गर्नेछ । दुई मैत्रीपूर्ण खेलका लागि राष्ट्रिय पुरुष फुटबल टोली सोमबार थाइल्यान्ड प्रस्थान गरेकाथियो । टोलीले दुई दिन प्रशिक्षण गरिसकेका छन् ।

एएफसी एसियन कप छनोटको तयारीमा रहेको नेपालले थप तयारीका लागि मैत्रीपूर्ण खेल खेल्न लागेको हो । यसअघि नेपालले माघ १५ गते र माघ १८ गते अफ्रिकी राष्ट्र मौरिसससँग दुई मैत्रीपूर्ण खेल खेलेको दुवै खेलमा नेपालले समान १–० को जित निकालेको थियो ।