एजेन्सी – इन्डियन प्रिमियर लिग (आइपिएल) २०२२ मा चेन्नई सुपर किंग्सका सर्वाधिक सफल कप्तान महेन्द्रसिंह धोनीले कप्तानी जिम्मेवारी अलराउनडर रविन्द्र जडेजालाई हस्तान्तरण गरेका छन् । योसँगै जडेजा चेन्नईको तेस्रो कप्तान बनेका छन् । धोनीले २००८ देखिनै चेन्नईको कप्तानी गर्दै आएका थिए ।

करिअरको अन्तिम समयमा आएका धोनीले यस सिजनदेखि जडेजालाई कप्तानी हस्तान्तरण गरेका हुन् । जडेजा २०१२ देखि चेन्नईमा रहँदै आएका छन् । धोनीको कप्तानीमा चेन्नईले सन् २०१०, २०११, २०१८ र २०२१ को उपाधि जितेको थियो । २००८, २०१२, २०१३, २०१५ र २०१९ मा उप विजेता बनेको थियो ।

धोनीले २ सय १३ खेलमा कप्तानी गर्दा १ सय ३० खेलमा जित दिलाएका छन् । जडेजालाई यस सिजनमा चेन्नईले १६ करोड भारुमा अनुबन्ध गरेको थियो । धोनीलाई १२ करोड भारुमा अनुबन्ध गरेको थियो । सम्भव त धोनीले यस सिजनपछि आइपिएल खेल्ने छैनन् । जडेजा उत्कृष्ट अलराउन्डर हुन् ।

स्पिन बलिङ, उत्कृष्ट फिल्डिङ र फिनिसरको रुपमा चिनिन्छन् । चेन्नई मुम्बईपछि सर्वाधिक उपाधि जित्ने टोली हो । मुम्बईले पाँच उपाधि जितेको छ । समूह ए मा रहेको चेन्नईले शनिबार कोलकता नाइट टारइडर्ससँग खेल्दै सुरुवात गर्नेछ ।

दुई नयाँ टोली थपिएसँगै आइपिएल अव समूह चरणमा हुनेछ । १० टोलीलाई दुई समूहमा विभाजन गरिएको छ । समूह ए मा मुम्बई इन्डियन्स, कोलकाता नाइट राइडर्स, राजस्थान रोयल्स, दिल्ली क्यापिटल्स र लखनउ सुपर जायन्ट्स छन् । समूह बी मा चेन्नई सुपर किंग्स, सनराइजर्स हैदराबाद, रोयल च्यालेन्जर्स बेंगलोर, पन्जाब किंग्स र गुजरात टाइटन्स छन् ।

आफ्नो समूहमा रहेका टोलीसँग सबैले दुई दुई खेल खेल्नेछन् । अर्को समूहमा रहेका टोलीसँग १-१ खेल खेल्नेछन् । एक टोलीसँग दुई बढी खेल खेल्नुपर्ने हुन्छ । यसरी कुल १४ खेल खेलेपछि प्लेअफ समिकरण भने पहिला जसरी नै हुनेछ ।