काठमाडौं (हाम्रो खेलकुद) – एएफसी एसियन कप क्वालिफायर फुटसलको लागि नेपाली राष्ट्रिय टोलीको घोषणा भएको छ ।फुटसलका मुख्य प्रशिक्षक गौरव बस्नेतले २२ सदस्यीय टोलीबाट अन्तिम १४ सदस्यीय टोली घोषणा गरेका हुन् ।

अन्तिम चरणमा लक्ष्मण थापा, सुमित कुमार आले, विक्रान्त नरसिंह राना, धिरज जोशी, मिलन राई, प्रवेश जोशी, अमित लामा र मनोज गुरुङले स्थान बनाउन सकेनन् । प्रारम्भिक प्रशिक्षणमा ३२ खेलाडी रहेका थिए । त्यसपछि दोस्रो चरणमा २२ खेलाडी प्रशिक्षणमा रहेका थिए ।

एएफसी फुटसल एसियन कप छनोट चरणको खेलहरु १ देखि १५ अप्रिलसम्म किर्गिस्तानमा हुँदैछ । छनोटमा समूह ‘बी’ नेपालसहित उज्वेकिस्तान, ताजिकिस्तान र अफगानिस्तान रहेका छन् । नोलले १० र १२ अप्रिलमा खेल्ने तालिका छन् ।

समूह ‘ए’ मा इरान, आयोजक किर्गिस्तान, तुर्केमिनिस्तान र माल्दिभ्स परेका छन् । प्रतियोगिता अन्तर्गत साउथ तथा सेन्ट्रल जोनको दुवै समूहको शीर्ष दुई स्थानमा रहने टोलीले सन् २०२२ मा कुवेतमा हुने एएफसी फुटसल एसियन कपमा स्थान बनाउनेछन् । यस क्षेत्रबाट कुल ४ टोली छनोट हुँदा पश्चिमबाट ५, पुर्वबाट ३ तथा आसीआन क्षेत्रबाट ३ टोली छनोट हुनेछन् । आयोजक कुवेत अन्तिम चरणका लागि छनोट भइसकेको छ ।

अन्तिम टोली
गोलरक्षक – अनिष श्रेष्ठ र विश्वास पौडेल
फिक्सो – विजय श्रेष्ठ, सरोज तामाङ र सुरज गुरुङ
एला – आदिल हामिद, क्रिजल खड्का, मणि कुमार लामा, रोशन छन्त्याल, सुमित श्रेष्ठ र उर्केन शेर्पा
पिभोट – हेमन्त गुरुङ, खिमराज गुरुङ र किशोर गुरुङ