खेलकुद पत्रकार मञ्च गण्डकीको अध्यक्षमा बराल निर्वाचित

पोखरा (हाम्रो खेलकुद)– नेपाल खेलकुद पत्रकार मञ्च गण्डकीको अध्यक्षमा दीनानाथ बराल निर्वाचित भएका छन् । शनिबार भएको निर्वाचनमा बराल ९ मतको अन्तरले विजयी भएका हुन् । अध्यक्षका लागि भएको निर्वाचनमा बरालले २९ र उनका प्रत्यासी रञ्जन अधिकारीले २० मत प्राप्त गरेका थिए ।

अध्यक्षबाहेक अन्य सबै पद निर्विरोध भएको मञ्चले जनाएको छ । मञ्चको उपाध्यक्षमा सुरज श्रेष्ठ, महासचिवमा राजाराम पौडेल, सचिवमा शशीकुमार पौडेल, कोषाध्यक्षमा कविता घर्ती मगर चयन भएका छन् । त्यस्तै सदस्यमा दीपकराज मुल्मी, नारायण शाही, उमेश पुन, मानबहादुर घर्ती र राजु गिरी निर्विरोध निर्विाचित भए ।

अध्यक्ष पदमा निर्वाचित भएसंगै बरालले सबैभन्दा पहिला खेलकुदमा कलम चलाउने पत्रकारहरुका लागि सदस्यता खुलाउने पहिलो काम हुने बताए । उनले नेपाल खेलकुद पत्रकार मञ्चसंगको सम्बन्धलाई अघि बढाउँदै सहकार्य एवम् समन्वयमा अघि बढ्ने प्रतिबद्धता व्यक्त गरे ।