काठमाडौं (हाम्रो खेलकुद) – महिला प्रिमियर लिग (एमपिएल) सिजन- ४ को दोस्रो राउन्डको खेलमा ढुकु फुटसल, फुटसल ५ र क्रिजल एफसी विजयी भएका छन् ।

ढुकु फुटसलमा भएको खेलमा ढुकुले मेगा पावरलाई ४–२ ले पराजित गरेको हो । ढुकुको यो लगातार दोस्रो जित हो । यो जितसँगै ढुकु २ खेलबाट ६ अंक जोडेर शीर्षस्थानमा रहेको छ ।

अर्काे खेलमा फुटसल ५ ले विप्ले कुमारीलाई ७–३ को भारी अन्तरले पराजित गरेको छ । फुटसल ५ को यो पहिलो जित हो । पहिलो जितसँगै फुटसल ५ ले दुई खेलबाट ३ अंक जोडेको छ । पराजित कुमारी २ अंक जोडेर पुछारमा छ ।

यस्तै अर्काे खेलमा क्रिजल एफसीले स्टुडेन्ड फुटबल क्लबलाई ४–२ ले पराजित गरेको छ । क्रिजलको यो पहिलो जित तथा स्टुडेन्टको पहिलो हार हो । यो नजितापछि क्रिजल दुई खेलबाट ५ अंक जोडेर दोस्रो स्थानमा उक्लदा स्टुडेन्ट ४ अंक जोडेर तेस्रो स्थानमा रहेको छ ।

यस्तै बार्सा नेपाल र दि मिग्निटी महिलाजले ३–३ गोलको बराबरी खेल्दै अंक बाँडेका छन् । यो नतिजापछि अपराजित रहेको बार्सा नेपाल दुई खेलबाट ४ अंक जोडेर पाँचौ स्थानमा रहेको छ । पहिलो हार बेहोरेको मिग्निी ३ अंक जोडेर सातौ स्थानमा रहेको छ ।

एमपिएल दि वि युनाइटेड प्रोजेक्टद्धारा सञ्चालित नेपालको पहिलो महिला फुटसल लिग हो । यो पूर्णरुपमा महिलाहरुद्धारा सञ्चालित लिग हो । जहाँ महिलाले खेल्ने र महिलाले खेलाइने छ । यहाँ ८० भन्दा बढी महिला रहेका छन् ।

एमपिएलमा ८ टोलीको सहभागिता रहेको छ । लिगका खेल हरेक शनिबार ९ अप्रिलसम्म खेलाइनेछ । ८ टोलीले ६ साताको अवधिमा एक अर्कासँग खेल्नेछ । प्रत्येक जित, बराबरी र हारमा टोलीलाई अंक प्रदान गरिनेछ । बढी अंक बटुल्ने शीर्ष तीन टोलीलाई विभिन्न प्रायोजकहरुले प्रदान गरेको पुरस्कार प्रदान गरिनेछ ।